OEKUSI (timorpost.com) – Prezidente Autoridade Rejiaun Administrativu Espesiál Oe-cusse Ambenu (RAEOA), Arsénio Paixão Bano, akompaña hosi Diretór Rejionál Infraestrutura, Candido dos Reis Amaral no Xefe Departamentu Estrada Ponte Kontrolu e Cheias, Camilo D. J. Quefi, vizita projetu konstrusaun ponte Bitopa.
Informasaun ne’e Timor Post asesu hosi pájina ZEESM-TL katak, ponte Bitopa ne’e lokaliza iha aldeia Buqui, suku Usi-Tasa’e, sub-rejiaun Oesilo, ne’ebé mak daudaun ne’e atinji ona porsentu 52 no ponte Noetoko iha aldeia Kuanobe, suku Banafi, sub- rejiaun Nítibe, atinji ona porsentu 61.
Objetivu hosi vizita ne’e, Prezidente Autoridade RAEOA atu haree direta progresu servisu konstrusaun ponte Bitopa ho Noetoko nian, hodi enkoraja kompañia sira atu bele aselera servisu tuir kontratu.
Enkuantu, progresu servisu iha projetu konstrusaun ponte Bitopa ne’e atinji ona porsentu 52, no projetu refere nia medida naruk metru 64 no kompleta ho protesaun moru no gabiaun metru 170.
Projetu ne’e ezekuta hosi kompañia Am-Lhichoe Unip. Lda ho durasaun servisu fulan haat, no valór kontratu 406,945.00 USD no kompañia rekruta traballadór kuaze ema na’in-20.
Entretantu, vizita daruak iha projetu konstrusaun ponte Noetoko no Nefometan 1 no 2, suku Banafi, sub-rejiaun Nítibe, ne’e atinji ona porsentu 61, projetu refere nia medida naruk metru 160 no kompleta ho moru no gabiaun.
Projetu ne’e ezekuta hosi kompañia Lifau Indah Unip. Lda ho durasaun servisu durante fulan neen no valór kontratu 625,451.54 USD no kompañia rekruta traballadór kuaze ema na’in-40.
Tuir diretór kompañia rua ne’e, sei aselera servisu hodi finaliza iha tempu badak nia laran, tanba durante servisu paradu kauza hosi udan no mota boot.
1,494 total views, 3 views today
Bele hare Video Seluk :
Subscribe to Timorpost
