Dili (timorpost.com) — Sala Leitura Xanana Gusmão (SLXG), ohin konsege halo lansamentu ba produsaun livru rua kona-ba istória Makasae no Baikenu.
Kona-ba fundu ba produsaun livru rua ne’e Sala Leitura Xanana Gusmão (SLXG), hetan apoiu hosi Governu Vitória Australia.
“Ba lansamentu livru ohin ne’e nian ba livru Makasae no Baikenu, Projetu ida ne’e ami hetan fundus husi Vitória Governu Australia, hodi produs livru sira ne’e ba labarik ba iha lian lokál”, Jestorá SLXG, Maria Amaral Guterres, dehan iha Sala Leitura Xanana Gusmão, Sesta (16/12).
Nia haktuir, ida ne’e hanesan livru kontinuasaun, tanba antes ne’e iha tinan 2021 produs ona livru ba labarik sira iha lian mambae.
Nia esplika, objetivu ba produsaun Livru ne’e maka atu hasae númeru Lei ba labarik sira no prezervasaun ba lian lokál sira.
Nia hatete, ba produsaun livru refere, sira koopera ho vitória Governu Australia, ne’ebé apoiu fundus, knua boneka no mós Komunidade husi Makasae no Baikenu. Ida ne’e sira servisu hamutuk ho alin Joven sira liuliu autór sira ne’ebé ohin partisipa iha ne’e, no Rádiu Liberdade nian maka halo gravasaun iha ne’ebá.
“Konteúdu husi livru ne’e iha istória rua kompostu husi Ai-Knanoik no klasifikasaun, hanesan ita hotu hatene katak Ai-Knanoik ne’e istória lenda husi Komunidade Makasae no Baikenu, no istória fiksaun ne’e hanesan joven sira iha imajinasaun ne’ebé hakerek iha livru sai istória ba labarik sira hodi kompriende”, Jestora ne’e tenik.
Iha livru istória rasik mós iha tradusaun lian tetun atu nune’e komunidade sira seluk no lian sira seluk bele kompriende kona-ba produs Livru ida ne’e.
Depois lansamentu ida ne’e, livru sira sei distribui ba Komunidade Makasae no Baikenu no mós ba Biblioteka, eskola nian no parseiru sira iha Munisípiu inklui labarik sira.
1,441 total views, 3 views today
Bele hare Video Seluk :