DILI (timorpost.com) – Governu liuhusi Ministériu Edukasaun Juventude no Desportu (MEJD) distribui sertifikadu apresiasaun ba jornalista hamutuk na’in-23.
“Ami distribui sertifikadu apresiasaun ba jornalista na’in-23 husi media hanesan Rádiu Televizaun Timor-Leste, Timor Post, STL, Independente, Mudansa Online, Televizaun Edukasaun no Tatoli ne’ebé durante kobertura iha area Edukasaun liga ba MEJD nia atividade”, Ministru Edukasaun Juventude no Desportu, Armindo Maia, hateten ba jornalista sira hafoin distribui sertifikadu ba jornalista sira iha salaun MEJD Vila Verde, Sesta (02/06).
Governante ne’e dehan, serfikadu apresiasaun ne’e hanesan rekoñesimentu ida husi MEJD ba jornalista sira ne’ebé durante ne’e halo servisu kobertura ba iha MEJD nia atividade iha Dili no munisípiu sira kona-ba konstrusaun edifísiu eskola, halo reabilitasaun eskola, inklui apoiu fasilidade kadeira, meza no entrega plaka ba eskola primária to’o sekundária públiku, privadu no eskola tékniku vokasionál.
Nia dehan, iha munisípiu sira hotu ne’ebé media sira kobertura hodi fó sai informasaun ba públiku hodi asesu, tanba ne’e maka MEJD oferese sertifikadu ida ne’e hanesan rekoñesimentu ba media sira nia kontribuisaun ne’ebé durante kontribui liuhusi tranzmite informasaun ba públiku.
Tuir nia, media nia papél importante tebes iha país hotu tanba media maka sai matan tilun ba iha públiku hodi divulga notísia iha area edukasaun, saúde, ekonomia, polítika no infraestrutura báziku ba lian laek sira.
Tanba husi media nia maka públiku bele asesu informasaun hotu-hotu liu-liu ministériu ida-idak nia servisu durante ne’e nia halo no mós media maka tranzmite informasaun problema infraestrutura báziku liga ba edukasaun iha baze liga fasilidade eskola, kadeira, meza, menus rekursu umanu.
“Ami buka dalan hodi bele rezolve ba problema hirak ne’e tanba ami asesu informasaun ne’ebé media sira fó sai liu husi televizaun, rádiu jornál online liga ba fasilidade menus iha eskola primária to’o eskola sekundária”, nia esplika.
“Tanba ne’e ha’u agradese tebes ba media hotu tantu públiku no privadu nia kontribuisaun durante iha ha’u nia mandatu ne’e servisu di’ak tebes MEJD nia atividade halo media sira sempre kobertura hodi fó sai notísia ba iha públiku hodi bele asesu informasaun tanba ne’e agradese nafatin ba ita boot sira nia kolaborasaun durante”, nia agradese.
Tanba ne’e, nia husu nafatin ba media sira halo kooperasaun di’ak ho MEJD, maski nia mandatu hotu ona maibé, governu foun mai husu ita boot sira nafatin koopera ho di’ak hodi halo kobertura ba MEJD nia atividade hodi bele tranzmite informasaun ba iha públiku.
1,704 total views, 3 views today
