DILI, (timorpost.com)— Komandante PNTL munisípiu Dili, Superientidnte Xefe Polísia, Orlando Gomes, aprezenta programa postu móvel ba Komandante Jerál PNTL, Komisáriu Polísia, Henrique da Costa, no Segundu Komandante Jerál PNTL, Komisáriu Polísia, Pedro Belo, bainhira hala’o vizita dahuluk ba iha Komandu PNTL munisípiu Dili.
“Ita uza postu móvel ne’e hanesan planu futuru presiza rekursu no presiza fasilidade no rádiu komunikasaun sira ne’e, ida-ne’e sai pakote ida, atu nune’e ita bele halo atendimentu besik liu ba ita-nia komunidade, hodi nune’e sira sente seguru katak prezensa polísia liuhosi posibilidade ne’ebé iha”, dehan, Orlando Gomes, ba jornalista sira iha Komandu PNTL munisípiu Dili, Kinta, (22/02).
Nia hatutan, “Iha planu ba futuru presiza postu móvel ida para atu kualkér atendimentu saida de’it bele ba atende, liuliu komunidade bele hato’o keixa ka hato’o sira-nia preokupasaun ba polísia.
Husi aprezentasaun ne’e, Komandante Jerál PNTL, Komisáriu Polísia, Henrique da Costa, hatete kona-ba postu móvel ne’e di’ak maibé presiza sukat mós kapasidade rekursu umanu ne’ebé iha.
“Ita mós tenke sukat ho ita-nia kapasidade rekursu umanu nian ita harii postu maibé kuandu laiha ema mós ita hanesan de’it, depois parte seksaun disiplinár munisípiu nian, ita dehan diresaun nasionál disiplinár nian ho komandu bele halo pasa revista ka jere rekursu ne’ebé ita instala dala ruma ema laiha”, Henrique informa.
Tanba ne’e, Komandu Jerál PNTL sei haree planu no programa ne’ebé Komandu PNTL munisípiu Dili aprezenta depois sei deside bele harii postu móvel ka lae.(*)
2,640 total views, 21 views today
Bele hare Video Seluk :