KOVALIMA (Timor Post)–Ekipa konjunta Servisu Sekreta kompostu hosi Servisu Informasaun Polisia (SIP) Nasionál, Servisu Nasionál Intelijénsia (SNI) no Seksaun Investigasaun Kriminál Munisípiu Kovalima, halo vijilánsia hodi kaptura timor oan nain-4 iha karreta ida hatama mina ilegál liuhosi fronteira Indonézia mai Timor-Leste, iha area tasi ibun Salele, Aldeia Ai-Oan, Suku lalawa, Postu-Administrativu Tilomar, Munisípiu Kovalima.
Tuir informasaun Timor Post, asesu hosi Portál Ofisiál SRP, Segunda (18/07), katak suspeitu timoroan nain-4 ne’e ho naran inisial, MA, tinan 30, hela fatin Suai Vila, Aldeia Sukavilaran, Suku Suai Loro, Postu-Administrativu Suai Vila, AN, tinan 21, Aldeia Wetaba, Suku Beiseiuk, Postu Administrativu Tilomar, FN, tinan 17, hela iha Aldeia Wetaba, Suku Beiseiuk, Postu Administrativu Tilomar no suspeitu ne’ebé ho motor sai mata dalan maka JC, tinan 18, Aldeia Wetaba, Suku Beiseiuk, Posto-Administrativu Tilomar.
Prosesu kapturasaun ne’e kategoria hanesan “flagrante de lito” ba suspeitu nian-4 iha Karreta laran ho marka Rava ho xapa matríkula 20.558 ne’ebé tula kombustivel iha karreta laran inklui suspeitu motor Honda Supra X 125 kór mean ne’ebé sai mata-dalan iha prosesu tranzasaun ilegál ne’e.
Hafoin halo inkéritu suspeitu sira deklara sai na’in ba mina ne’e ho naran inisial AM, tinan 26, husi Aldeia Ahinarai, Suku Debos ne’ebe pertense ba Postu-Administrativu Suai Vila no nia sai hanesan Matadalan hodi observa situasaun durante tranzasaun.
Ikus nia informa, agora suspeitu no objetu kontra bandu hirak ne’e asegura ona iha Komandu Munisípiu Kovalima hodi kontinua halo prosesu investigasaun.
876 total views, 3 views today
