MANUFAHI– Servisu Apoiu Sosiedade Sivíl no Auditoria Sosiál (SASCAS-sigla Portugés) ho Fundasaun Luta ba Futuru (F-LBF), sesta (15/12) liu ba halo lansamentu tau fatuk dahuluk ba konstrusaun edifísiu Uma Paz iha Munisípiu Manufahi.
Iha ámbitu lansamentu ne’e, Diretora Ezekutivu F-LBF, Maria Boky Doloroza Fernandes esplika, konstrusaun edifísiu ne’e tanba hetan apoiu fundu orsamentu husi SASCAS.
“Orsamentu ne’ebé ita hetan husi SASCA ho totál U$25,000.00 no husi totál fundu ne’e, U$23,000.00 resin halo konstrusaun edifísiu no U$1,000.00 resin utiliza ba atividade operasionál,” dehan Maria.
Nia hateten, apoiu orsamentu ba konstrusaun ne’e atu hodi fasilita vítima violénsia bazeia ba jéneru, hanesan inan feto no labarik feto sira ne’ebé hetan violasaun.
“Durante ne’e kazu violensia hasoru feto no labarik barak akontese iha Munisípiu Manufahi, lori ba Covalima no Dili hodi proteje iha Uma Mahon sira no halo viajen ne’ebé do’ok tebes husi munisípiu,” nia dehan.
Bazeia ba situasaun sira ne’e, liu husi koordenasaun di’ak ho rede referral sira konsege harii uma paz ida iha Manufahi iha tinan 2018 ne’ebé responsabiliza husi F-LBF no Caritas Australia to’o agora.
Nune’e hetan apoiu mós husi rede referral sira husi Ministériu Solidariedade Sosiál no Inkluzaun (MSSI), Sekretáriu Estadu ba Igualdade (SEI), polísia VPU, no organizasaun ALFELA, PRADET, fundasaun Ázia, organizasaun feto sira no lideransa komunidade ho Ofisiál Polísia Suku (OPS) sira ne’ebé haforsa uma paz nia ezisténsia to’o ohin loron hodi fo protesaun ba vítima sira hafoin re-integra fali ba família.
Hahú husi 2018 to’o ohin loron uma paz fó ona atendimentu ba vítima sira hamutuk na’in 54 no maioria kazu violénsia doméstika, violénsia seksuál, kazu abandona, no kazu violénsia psikolójiku.
Ezekutivu ne’e aprezenta, estabelese ona Uma Paz ida hodi hamahon vítima sira maibé fundasaun aluga de’it komunidade nia uma tanba laiha fatin uma permanente. Nune’e mak F-LBF hato’o proposta ba SASCAS hodi husu apoiu orsamentu atu halo konstrusaun ba edifísiu ho medida metru 9,5 x 7. Edifísiu prontu sei hodi halo serbisu atendimentu ba vítima sira maibé F-LBF sei esforsu nafatin buka fundu seluk atu aumenta tan konstrusaun moru hale’u.
Responsavel F-LBF ne’e, hato’o agradese ba Administradór Munisípiu Manufahi (AMM) ne’ebé oferese ona rai administrasaun munisípiu nian hodi halo konstrusaun ba uma paz.
Fatin hanesan Diretór Ezekutivu SASCAS, Edvin Soares Noronha argumenta katak, SASCAS prontu apoiu ba konstrusaun edifísiu ne’e atu fó protesaun ne’ebé seguru ba vítima sira.
“Apoiu ne’e SASCAS fó ba uma paz iha munisípiu rua, ba Manufahi halo konstrusaun foun no munisípiu Baukau atu apoiu ba prosesu counseling ka re-integra vítima sira ba nia família tanba sira iha ona kondisaun di’ak,” nia relata.
Partisipa iha serimónia lansamentu ne’e, reprezentante administradór munisípiu Manufahi, diretór serbisu munisipais no delegasaun territoriál sira, komandante eskuadra Same ho membru no sosiedade sivil sira iha Manufahi.(#)
798 total views, 3 views today
Bele hare Video Seluk :
Subscribe to Timorpost
