DILI (timorpost.com) – Sekretáriu Estadu Formasaun Profisionál no Empregu (SEFOPE), rejistu traballadór Timoroan na’in-400 iha Australia halai sees sistema hodi hala’o servisu ho ilegalmente.
“Traballadór Timoroan lubuk ida mak halai sai husi sistema, iha Australia kuaze 400 impaktu husi Covid-19 mosu, bainhira atividade iha Australia lala’o”, dehan Diretór Diresaun Nasionál Empregu Exterior SEFOPE, Filomeno Soares, ba Jornalista iha Timor Plaza, Suai Room, Tersa (13/12).
Nia dehan, bainhira Covid-19 la’o normal ona, Governu Timor-Leste esforsu makaas no buka dalan ba sira no motivasaun ba sira labele hasees husi sistema, karik halai sees husi sistema ne’e risku boot.
Nia esplika, traballadór ne’ebé ilegál ona signifika lakon ona servisu iha nasaun Australia no sira-nia mobilizasaun iha Australia kloot, imigrasaun sei buka tuir atu kaptura nune’e haruka fila mai Timor-Leste.
“Antes sira ba servisu ami ko’alia ba sira, maibé ita la hatene karakter ema ida-idak nian, maibé Governu la nonook hodi buka solusaun ba sira”, katak nia.
Nia informa, daudaun ne’e traballadór kuaze na’in-10 mak fila ona mai Timor-Leste tanba sira hetan moras, bainhira sira envolve ba aktu hirak ne’e sei fó risku ba nia aan no mós família.
Maibé, Governu Timor-Leste esforsu makaas servisu hamutuk ho Governu Australia hodi manan konfiansa nune’e labele prejudika ba programa SEFOPE nian.
Diretór tékniku SEFOPE ne’e afirma tan katak, la’ós traballadór iha Australia de’it mak hasees aan husi sistema, maibé iha Korea kuaze 700.
“Ami sempre fó hanoin ba sira katak, imi deside sai traballadór ilegál, maibé imi haree atividade ne’ebé empregadór fó ne’e durasaun hanesan kontratu uluk ne’e ka lae, keta semana ida de’it atividade hotu ona ne’e hamate sira, maibé ita-nia alin sira sempre kontra”, nia enkoraja.
Nia informa, Governu Timor-Leste nafatin halo komunikasaun ho embaixadór, reprezenta Governu Timor-Leste iha Korea, organizasaun balun no mós relijioza atu fó hanoin nune’e hakmatek depois servisu di’ak.
Nia dehan, karik sira hasees aan ona husi sistema difisil ona tama fali sistema tanba ne’e regulamentu nasaun nian.
3,029 total views, 6 views today
Bele hare Video Seluk :
Subscribe to Timorpost
