DILI (timorpost.com) — Haree joven Timoroan sira ba Portugal toba iha Jardín, Prezidente Repúblika (PR), José Ramos Horta, hatete tanba la rona Governu.
“Ita ida-idak sai husi Timor konforme ita-nia hakarak, Governu no ha’u rasik aviza dala-barak ona, atu ba li’ur buka serbisu, hetan kontratu ba li’ur, kuandu ita ho idade 17 ba leten ita maioridade,” Xefe Estadu hatete, iha Salaun VIP Aeroportu Internasionál Nicolau Lobato Komoro, Tersa (13/12).
Nia dehan, ne’e la’ós timoroan de’it, ema sira ne’ebé husi Áfrika, Xina ka nasaun ne’ebé de’it atu ba Portugál, mais sira la buka atu toba iha Jardín, sira iha Bilete, marka Ótel.
“Agora ita sai arbiru la rona avizu husi Governu no ha’u haree Autoridade Polisiál sira to’o agora la rona buat ida kona-ba grupu sira ne’ebé krime organizadu ne’ebé bosok joven sira,” Xefe Estadu dehan.
PR subliña, to’o agora nia ezije tiha ona relatóriu iha fulan hira ona, la rona kazu ida ne’ebé liuhusi Prokuradór Jerál Repúblika ba Tribunál. Enatun ema kontinua sai, ema bosok joven sira no sira ba toba iha li’ur, tanba osan laiha atu ba Otél.
“Ha’u to’o ba Portugál, ha’u la konvidadu Governu Portugés karik ha’u ba Otél, ha’u mak selu, agora ita sai ba toba iha Jardín ne’e Governu Portugés mak sala ou Governu Timor mak sala,” Xefe Estadu relata.
Alende ne’e mós Xefe Estadu, husu ona kona-ba PSIK ho Autoridade Seguransa hodi hala’o seguransa, maibé to’o agora Timoroan sira nafatin toba iha jardín ka dalan.
“Ha’u sei konvoka fila fali konsellu defeza seguransa para rona informsaun husi orgaun sira ne’ebé haree ba Krime Organizadu ne’ebé bosok ema tuun no sa’e, ba joven sira atu sai vítima,” PR Horta dehan.
Antes hakotu nia dehan, mais informasaun barak loos, sé mak rona ou akompaña televizaun kuidadu, mais kontinua balu halai ba Malazia, balu ema bosok, hanesan foin daudauk Embaixadór Malazia, hatete joven balu ema bosok joven sira husi ne’e ba Indonézia, Indonézia lori ba Malazia, depois Joven sira ne’e rasik halai ba Embaixada hodi husu ajuda.
3,876 total views, 3 views today
Bele hare Video Seluk :
Subscribe to Timorpost
