DILI, (timorpost.com)— Ministério Transporte no Komunikasaun (MTK) liuhosi Diresaun Nasionál Meteorolojia no Geofizika (DNMG) atualiza katak illa timor sei la hetan ka la afeita husi eventuál natureza Eklipse Solar Totál, hanesan informasaun ne’ebé daudauk ne’e espalla iha média sosiál.
Tuir informasaun ne’ebé Timor Post asesu ohin (27/03) iha pájina Facebook DNMG Timor-Leste, informa ba públiku relasona ho informasaun ne’ebé espalla iha média sosiál no desde horseik (26/03) DNMG simu kontaktu no mensajen kona-ba eventu ASTRONOMIKA hanaran Eklipse Solar Total ne’ebé sei akontese iha loron 8 fulan-Abril tinan 2024.
Iha biban ne’e DNMG hakarak atualiza ba públiku katak “Informasaun eventu ASTRONOMIKA” atu akontese ne’e LOoS/VERDADE, maibé akontese apenas ba nasaun sira iha kontinente Amerika (nasaun sira ne’ebé sei experimenta eventuál refere mak hanesan hatudu iha imagem anexu) no iha restante nasaun sira iha mundu sei la hetan inklui illa Timor.
DNMG-MTK iha papél importante atu analiza, verifika no interpreta hafoin publika informasaun relasiona ho eventuál natureza sira hanesan (Eventu Meteorolójiku, Klimatolójiku, Astronómiku, etc), bainhira monitora, analiza no verifika evenuál natureza sira ne’ebé akontese iha Timor-Leste ka akontese iha rejiaun ne’ebé besik no nia influénsia mai ilha Timor-Leste maka DNMG sei update, enkuantu akontese iha fatin seluk no influénsia mós iha fatin seluk DNMG sei la halo publikasaun.
Tamba ne’e, husu ba públiku atu esklui informasaun ne’ebé mai husi fonte ne’ebe la klaru ka la kredível liga ho eventuál natureza sira.(*)
3,525 total views, 6 views today
Bele hare Video Seluk :