DILI (timorpost.com) – Lider Nasionál Francisco Guterres Lu-Ólo moras derepente, no evekua ona ba Hospital Nasionál Guido Valadares (HNGV), Prezidente Repúblika (PR), José Ramos Horta, halo vizita urjente.
Tuir imformasaun ne’ebé Timor Post hetan, atual Prezidente Partidu FRETELIN ne’e hetan moras atakasaun derepente iha loron Segunda Feira (12/09), kalan hodi evakua kedas mai iha HNGV.
Enkauntu hafoin rona Eis Prezidente ne’e moras, atuál Prezidente Repúblika, José Ramos Horta, iha loron Tersa Feira (13/09) kalan maizumenus tuku 09 resin ne’e halo kedas vizita urjente hodi ba haree Lú-Olo nia kondisaun iha HNGV.
Hafoin Jornalista sira kompostu husi média, Jornal Timor Post, Independentes, STL nune’e mós GMN, tenta hodi hakat ba sala VIP hodi haree no halo konfirmasaun maibé, seguransa sira iha HNGV la autoriza hodi Jornalista sira tama ba kobertura iha tempu kalan ne’e.
Nune’e informasaun ne’ebé Timor Post asesu, Prezidente Partidu FRETILIN, Francisco Guterres Lu-Ólo, baixa hela iha HNGV, sala VIP númeru Primeiru kedas.
Tuir komunikadu imprensa ne’ebé Timor Post asesu husi Pájina ofisiál Partidu FRETILIN katak, Lú-Olo daudaun simu hela atensaun medika sira ne’ebé presiza husi doutor sira iha HNGV, maibé nia kondisaun di’ak hela.
“Tuir loloos, Prezidente Lú-Olo tenke ba Malázia hodi hala’o ninia check-up regular iha fulan-Agostu liu ba. Maibé, tanba serbisu polítiku, nia seidauk bele ba. Nune’e, bainhira ninia kondisaun fízika rekupera iha loron hirak tuir mai ne’e, nia sei deside atu halo viajen ba Malázia atu hala’o check-up regular ne’ebé liu tiha ona tempu tuir médiku sira determina,” dehan komunikadu refere.
3,468 total views, 3 views today
