DILI (Timor Post) – Governu Timor-Leste hato’o sentidu kondolénsia ba família vítima Inundasaun liuhusi udan boot ne’ebé akontese iha Korea do Súl.
“Lori povu Timor-Leste nia naran, Governu hato’o kondolénsia ba família no belun vítima sira inundasaun nian ne’ebé kauza husi udan forte liu ne’ebé afeta ona Seul, kapitál Koreia Súl nian, hanesan akontese iha tinan 80 liu bá,” dehan Ministru Prezidénsia Konsellu Ministrus, Fidelis Magalhães, iha Palásiu Governu, Kuarta (10/08).
Nia dehan, durante Segunda-feira kalan, oras lokál, udan komesa boot ona, iha Seul no iha sidade viziña sira, rezulta ema mate pelumenus na’in-ualu no ema atus ba atus maka tenke evakua.
Udan ne’ebé makas tebes halo estragu barak materiál sira, hanesan edifísiu, veíkulu, estrada no infraestrutura sira seluk, provoka mós rai-halai no obriga tenke taka ahi elétriku no suspende servisu komboiu no metro nian.
Portavós Governu Konstitusionál Daualuk, Ministru Fidelis Magalhães, lori Governu tomak nia naran, hato’o katak “Ami-nia sentidu kondolénsia ne’ebé kle’an ba família sira ne’ebé lakon sira-nia ema ne’ebé sira hadomi”.
Nia hatutan, iha loron difisil sira-ne’e, Timor-Leste hato’o ninia solidariedade ba Governu no populasaun tomak Repúblika Koreia nian.
2,290 total views, 3 views today
Bele hare Video Seluk :
Subscribe to Timorpost
