DILI (timorpost.com) – Mane isin metan ne’ebé hatais kalsa ho kór malahuk no uza faru mutin ne’ebé hafalun ho jáz kór malahuk, haree ba konversa hela ho nia belun deputadu sira seluk iha uma fukun Parlamentu Nasionál.
Bainhira jornalista Timor Post hakbesik ba deputadu ne’e hodi husu kona-ba situasaun moruk ne’ebe enfrenta iha tempu pasadu nian liuliu susesu ne’ebe hetan iha ninia karreira profisional.
Nia mak Alexandrino Afonso Nunes, atuál deputadu husi bankada Partidu Demokrátiku (PD). No nia haktuir, knaar ne’ebé nia hetan ne’e povu mak fó konfiansa liuhusi Eleisaun Parlamentár.
Tanba ne’e, nia promete katak, sei lori povu nia preokupasaun ba hato’o iha plenáriu hodi buka solusaun, tanba tuur iha Parlamentu Nasionál ne’e povu mak fó fiar. Tanba reprezenta povu iha Parlamentu Nasionál ne’e tenke levanta povu nia problema iha baze hodi buka solusaun.
“Kargu ne’ebé ha’u hetan ne’e konfiansa husi povu, tanba ne’e tenke tane aas povu nia preokupasaun hodi hato’o iha plenáriu Parlamentu Nasionál hodi buka solusaun atu rezolve. Tanba povu fó konfiansa mai ita iha eleisaun parlamentár ita tenke valoriza povu nia preokupasaun,” Maliana oan ne’ebé moris iha loron 28 fulan Janeiru tinan 1962 ne’e haktuir ba Timor Post iha resintu Parlamentu Nasionál, Kinta (22/06).
Nia dehan, assume kargu tenke iha responsabilidade boot, tanba sai hanesan matan no tilun hodi diskute povu nia preokupasaun no aspirasaun iha baze atu lori mai aprezenta plenária iha Parlamentu Nasionál atu hato’o ba governu hodi buka solusaun.
“Tanba povu fó fiar ba ita liuhusi eleisaun entaun saida mak durante ne’e ita promete iha tempu kampaña buat oi-oin entaun tenke realiza promesa ne’ebé mak hato’o ona, nune’e povu labele lakon fiansa,” nia hatutan.
Maliana-oan ne’e konta, uluk eskola iha primária to’o iha universidade nunka mehi atu sai deputadu, maibé loron no semana, fulan no tinan la’o ba daudaun komesa envolve iha vida polítika no ikus mai sai duni deputadu ida. Ne’e hanesan grasa no tulun husi Maromak.
Tuir nia, maski kargu deputadu ne’e la permanente, maibé bele reprezenta povu nia lian hodi hato’o povu nia aspirasaun ne’ebé sira hasoru, atu nune’e governu bele buka solusaun hodi rezolve.
“Ha’u kontente no apresia ho knar foun hanesan deputadu, tanba povu bele fó fiar liuhusi eleisaun parlamentár ba ami nia partidu no ohin loron ha’u simu pose hanesan deputadu ida hodi reprezenta povu atu hato’o povu nia preokupasaun”, eis Dosente UNTL ne’e haktuir.
Enkuantu, Alexandrino frekuente eskola primária iha tempu Portugés Maliana iha tinan 1974 to’o iha terseira klase tama fali iha funu, entaun para tiha eskola foin kontinua fali iha tempu Indonézia nian. Enkuantu, hafoin Timor-Leste hetan independénsia kontinua tan eskola to’o remata.
Bainhira hahú iha eskola pre-sekundária públiku 01 Maliana iha tinan 1979-1982 remata deside husik hela inan-aman iha Maliana hodi mai hela ho família iha Dili atu kontinua fali eskola sekundária iha eskola 01 Bekora iha tinan 1982-1985.
Remata la para iha ne’e, maibé nafatin kontinua estudu universidade nian iha Indonézia-Bali, iha Fakuldade Agrikultura no Departamentu Pekuáriu, remata iha tinan 1993.
Hafoin remata fila mai iha Timor hodi hala’o servisu iha NGO Internasionál ida, no funsaun ne’ebé servisu ba ne’e hodi kontribui ba rai ida ne’e lokaliza iha Zare, munisípiu Bobonaru iha tinan 1993-1996.
La to’o iha ne’e de’it, maibé hakarak buka fali esperiénsia seluk, entaun hala’o fali servisu hanesan Funsionáriu Públiku iha Diresaun Pekuáriu iha Maliana to’o iha tinan 1999, no tama ba iha situasaun difisil ema hotu preokupa ba vota hodi termina ukun rasik-an atu livre husi inimigu sira nia leet.
Iha tinan 2001 sai hanesan dosente iha Universidade Nasionál Timor Lorosa’e (UNTL) iha Fakuldade Agrikultura no Departamentu Pekuáriu to’o iha tinan 2004 buka fali esperiénsia seluk hodi servisu fali iha NGO Internasionál no la kleur de’it ba servisu fila hanesan Funsionáriu Públiku iha munisípiu Bobonaru, postu administrativu Maliana, hodi assume pozisaun hanesan resepsionista iha tinan 2007.
Aleinde ne’e mós, assume kargu hanesan Xefe Departamentu iha tinan 2009-2012, no bainhira remata nafatin hetan konfiansa husi superior hodi sai hanesan Xefe Departamentu Pekuáriu nian, maibé fahe tempu livre hodi envolve iha vida polítika, ne’e mak deside ba iha Partidu Demokrátiku (PD) iha tinan 2012.
Nune’e, iha tinan 2016 hetan konfiansa husi povu Maliana hodi sai hanesan Prezidente Partidu PD iha Maliana mai to’o ohin loron nafatin hetan konfiansa husi povu hodi hakat mai to’o iha uma fukun Parlamentu Nasionál hodi sai hanesan deputadu ida iha lejizlatura daneen.
“Ohin ha’u kontente ho knaar ida ne’e maski temporariu no la permanente, maibé bele reprezenta povu nia lian hodi hato’o povu nia problema iha plenáriu, nune’e governu bele buka solusaun hodi rezolve”, nia deklara.
Portantu, Alexandrino ho nia maun alin hamutuk na’in rua no daudaun ne’e forma ona família no servisu hotu ona.
Enkuantu, Alexandrino ho nia fuan sorin Maria Soares Mendonça de Araújo, hanesan dosente iha eskola universidade, no sira na’in-rua iha ona oan na’in-ualu.
Oan mane boot eskola ona iha Universidade Únika Kupan-Indonesia no sira seluk sei eskola iha sekundária no pre-sekundária.
2,007 total views, 3 views today
Bele hare Video Seluk :
Subscribe to Timorpost
