DILI—Deklarante Sesta Bázika (SB) hosi suku Komoro, postu administrativu Dom Aleixo, munisípiu Dili, husu ba oitavu Governu Konstitusionál atu fahe ona ai-han ba faze daruak nian.
Justinho Cabral nu’udar reklamante Sesta Bázika ba faze primeiru husi Aldeia 12 de Outubru, suku Komoro, postu administrativu Dom Aleixo, munisípiu Dili lamenta tebes kona-ba programa Sesta Bázika nian.
“Ami lamenta tebes kona-ba Sesta Bázika husi VIII Governu fó no kontinuasaun ami husu ami nia direitu iha etapa segundu nian”, sidadaun ne’e hateten ba Timor Post iha Tasi-Tolu, Sesta (04/03).
Família reklamante ne’e afirma, durante primeiru ajudasaun husi Governu kona-ba Sesta Bázika komesa iha loron 23 fulan Janeiru 2021, iha momentu ne’e iha ona informasaun husi Xefe Suku no Aldeia, katak atu hatán hotu komunidade nia dokumentu ne’ebé mak iha hanesan Eleitorál ho fixa Família.
Depois no fim, simu Sesta Bázika naran iha dokumentu Ministériu Solidariedade Sosiál no Inkluzaun (MSSI), entaun família reklamante ne’e rekoñese katak la iha direitu atu simu Sesta Bázika.
Nia konta, iha ne’ebá parte ne’ebé mak toma responsavel ba Sesta Bázika ne’e fó reklamasaun, ne’e iha primeiru faze, maibé reklamasaun ida ne’e nia rezultadu to’o ikus bainhira Sesta Bázika ne’e fahe hotu no ministériu ne’ebé mak tutela ba ne’e fó sai iha Radio no Televizaun katak, reklamasaun ne’ebé fó ba ne’e labale simu.
“Ne’ebé ami nia ezijénsia maka ne’e, reklamasaun ida ne’e, liuhusi ministériu kompetente mak haruka mai mak sira ne’ebé fahe sasán ne’e mak tau ka? Xefe Suku ho Aldeia mak tau reklamasaun? Ou reklamasaun iha baze ne’e mak na’in hanoin tau ne’e mak to’o ikus ministériu fó sai dehan katak reklamasaun ne’e labele,” nia dehan.
Nia hatutan, ba sira nia fixa família ne’ebé mak iha ne’ebá ministériu dehan katak, fixa família ne’e dala ruma iha dupla, nune’e dupla iha povu ki’ik bele dehan hanesan ne’e, iha nasaun ida ne’e, munisípiu ida iha ida ka rua.
Karik iha rua signifika, sira ne’e ida-idak halo ninia fixa família ho karimbu iha kotuk, ne’e mak sidadaun ida bele hetan rua.
“Maibé kuandu iha Governu ida mak iha Suku ida no aldeia ida, entaun ema ida ka sidadaun ida bele hetan fixa família ida, ho ida ne’e, ami husu ba ministériu hetan peskiza husi ne’ebé mak dehan, sidadaun hetan dupla,” Justinho Cabral lamenta.
Nia subliña, iha reklamasaun etapa primeiru mós la hetan mak to’o rezultadu ministériu fó sai katak, reklamasaun iha etapa primeiru Sesta Bázika ne’e la simu no la vale hotu.
Husi ne’e mós komunidade sira tenta konfima naran, maibé sira dehan la iha nafatin, nune’e sira hein to’o Sesta Bázika hotu to’o fali faze daruak nian ona.
Hatán ba preokupasaun ne’e, Xefe Suku Komoro, Eurico da Costa de Jesus, hatete, komunidade sira ne’ebé mak barak hanesan fixa família la rejista iha suku ne’e, atu dehan de’it katak deferénsia husi situasaun Pandemia Covid-19 sira barak mak muda sira nia Eleitorál.
Agora sira ne’ebé mak ho kartaun Eleitorál tuan ka hela kleur iha ne’e naran la iha, husi ne’e mós nia (Xefe Suku) haree no triste uitoan tanba komunidade sira barak mak naran la iha.
“Ha’u iha ne’e, sira ko’alia kona-ba reklamasaun anterior, ne’e iha Covid-19 ninian ne’e ho orsamentu ketak, ne’e ladún tama iha ne’e,” nia dehan.
Nia hatutan, mais reklamasaun ne’ebé mak rejista agora no konta hirak ne’ebé mak hela iha Tasi-Tolu aldeia 12 de Outubru naran la iha hotu ne’e tenke haree iha tempu loron 15 nia laran para hadi’a fali sira nia Eleitorál no sira ne’ebé mak fixa família la iha karik sira bele tama ba iha prosesu reklamasaun.
Xefe Suku ne’e dehan tan, ho ida ne’e, nia (Xefe Suku) rona katak, komunidade sira ne’ebé mak naran la iha bele halo reklamasaun.
Nia esplika, komunidade tomak ka sidadaun sira ne’ebé iha nasaun ida ne’e nia laran, ne’e sira livre, komunidade la’ós Polísia sira ka F-FDTL sira, karik sira la’o ba ne’ebé tenke hetan autorizasaun husi komandante maka foin bele ba.
“Maibé kona-ba populasaun ne’e livre, dala ruma kuandu ita ba atu foti reklamasaun, sira nia fatin la iha, depois fixa sira ne’e tama hotu ona ba reklamasaun mak sira mai, nune’e sira mai ne’e labele tama ona iha kategoria”, nia hateten.
1,779 total views, 3 views today
Bele hare Video Seluk :
Subscribe to Timorpost
