DILI—Ministru Koordenadór Asuntu Ekonómiku (MKAE), Joaquim Amaral, hatete, distribuisaun programa sesta bázika agora kontinua hela, maibé ba reklamante sira bainhira lejislasaun ne’ebé haruka ona ba Prezidente Repúblika seidauk promulga maka sei fó impaktu ba implementasaun programa ne’e, liu liu distribuisaun sesta bazika ba reklamante sira.
Ministru Joaquim Amaral, afirma, distribuisaun programa sesta bázika presiza konklui distribuisaun balu, tanba ekipa kontinua halo servisu iha tempu restu ne’ebé iha.
“Ba reklamante sira, agora distribuisaun hotu ona, agora ita taka ho reklamante sira, ita difikuldade uitoan lejizlasaun seidauk hetan promulgasaun”, nia informa ba jornalista sira, hafoin remata enkontru ho Primeiru Ministru, Taur Matan Ruak, Sesta (02/06) iha Palasiu Governu.
Nia hatete, presiza hein tuir lejizlasaun iha prezidente repúblika, atu nune’e bele prosesa direitu reklamante sira.
Parte governu hein katak tempu besik kestaun ne’e bele iha solusaun, bainhira prezidente republika promulga diploma refere maka bele halo kedas distribuisaun ba reklamante sira dala ida. Maibé bainihra veta ida ne’e kabe ba prezidente republika.
“Ami servisu tuir diploma ne’ebé iha, revizaun diploma ne’e submete ona ba, ami sidauk simu informasaun resposta, ami hein katak bele iha solusaun ba ida ne’e”, nia afirma.
Tuir nia bainhira Prezidente Repúblika la promulga maka governu oin mak bele kontinua halo distribuisaun tanba ne’e ligasaun ho ema nia direitu tanba balu simu ona, balu sidauk
Tuir dadus hosi MKAE nian iha kuaze suku haat mak sidauk distribui ba, Dili iha suku Rua, Baukau iha suku rua mas balu iha aldeia de’it.
Antes ne’e iha sorumutu konsellu Ministru fulan Marsu liuba halo ona aprovasaun ba Dekretu-Lei, ne’ebé aprezenta husi Ministru Koordenadór Asuntu Ekonómiku, Joaquim Amaral, ho objetivu atu estende distribuisaun sesta bázika.
Dekretu-Lei nu. 10/2022, loron 4 fulan-Marsu, ne’ebé aprova ona medida sira ba distribuisaun sesta bázika nian ba família timoroan sira ne’ebé presiza liu no apoiu ba operadór ekonómiku lokál sira. Tanba ho aprovasaun ba diploma ida-ne’e, prazu distribuisaun sesta bázika, molok ne’e define ona to’o loron 30 fulan-Maiu tinan 2023.
1,410 total views, 6 views today
