DILI (timorpost.com) — Autoridade Munisípiu Dili (AMD), liuhosi Jestaun Merkadu sira implementa regra ba negosiante sira iha Merkadu Manleuana.
Jestór Merkadu Manleuana, Julio Barros Calves, hatete negosiante sira obrigatóriamente kumpre regulamentu ne’ebé estabelese iha merkadu ne’e.
“Bazeia ba planu ne’ebé iha no mós tuir nia regulamentu katak negosiante sira obrigatóriu tenke kumpre, tanba iha tinan hira ba kotuk vendedór sira lubuk ida mak iha hela jardín hodi hala’o sira-nia atividade negósiu”, nia informa ba Timor Post iha nia knaar fatin Merkadu Manleuana, Kuarta (09/11).
Jestór ne’e hatete, fulan tolu liubá sira halo preparasaun mudansa ba vendedór sira ne’ebé iha jardín no estrada ninin sira ne’e muda hotu ba laran.
“Iha fulan hirak ba kotuk ne’e ami muda hotu vendedór sira ne’ebé halo sira-nia atividade negósiu iha jardín laran no estrada ninin sira ne’e tama hotu ba merkadu laran, atu nune’e bele fó espasu ba movimentu ema nian ba no mai”, dehan nia.
Tanba ne’e mak jestór sira implementa regulamentu refere ba negosiante sira, se mak la kumpre sei hetan multa.
“Iha vendedór na’in sanulu resin mak sei iha merkadu kotuk, sira foin lalais mosu dez-entendementu ho ami, sira ezije atu mai fan fali iha jardín ne’e ho razaun katak sira iha merkadu laran ema kompradór menus”, nia salienta.
Nia hatete, nia funsaun atu kontrola negosiante sira ida-idak tenke mantein iha nia fatin.
“Ha’u-nia pozisaun mak tenke kontrola negosiante sira metin iha merkadu laran, ha’u sei la autoriza sira halo tuir sira-nia hakarak, tanba ha’u simu orden hosi ha’u nia superior sira, ne’ebé ha’u la’o tuir de’it saida mak iha”, nia dehan.
Aleinde ne’e iha fatin hanesan, Vendedór, Vitoria da Costa Magno, hatete modo hirak ne’ebé sira fan ne’e, sira sosa fali hosi Aileu no Maubisse.
“Modo sira agora ami fan iha ne’e, ami sosa fali hosi Aileu no Maubisse, ami sosa 10 SUD no ami fan fali ami manan mak 2 USD, ami la fan karun, futun ida ami fan ba Sentavu 50”, nia subliña.
Modo sira fan ne’e mak hanesan mostarda, modo mutin, modo metan, ai-farina tahan, berinjela, batar tomak, batar fai, tomate, ai-manas, liis mean, liis mutin no modo sira seluk tan.
2,173 total views, 3 views today
Bele hare Video Seluk :