DILI (timorpost.com) — Ministru Prezidensiál Konsellu Ministru, Fidelis Magalhães, hala’o enkontru entre Ministru no Ministra hodi foti ona desizaun katak, sira sei la simu subsídiu fim do ano 200 USD ne’ebé atu fó ba uma-kain sira iha fulan Dezembru.
Fidelis hatete, desizaun Governu hodi fó subsídiu ne’e ba ema hotu-hotu tanba ho opsaun sira ne’ebé iha, tanba ne’e agora sira kontinua foti desizaun sira hotu hodi akumuladu hamutuk.
“Bainhira halo aprovasaun ne’e mós governante sira hahú husi Primeiru Ministru no Vise Primeira Ministru no Ministru-Ministra sira deside no konkorda katak sira sei la simu, kuandu fahe ona osan,” dehan Fidelis, iha Palásiu Governu, Kuarta (05/10).
Nia dehan, Maneira ida ne’e inklui mós sidadaun sira seluk, karik sira dehan iha hela, sira ho konxiénsia rasik la ba foti no fó fali ba ema seluk mós laiha buat ida, importante ho konsisténsia rasik.
“Foin daudaun mós Prezidente Repúblika, José Ramos Horta, fó opsaun rua, opsaun ida mak fó de’it ba hirak ne’ebé iha saláriu 500 USD mai kraik, opsaun ida seluk mak ema hotu-hotu simu, maibé sira ne’ebé lakohi tenke iha konsisténsia rasik fó fali ba ema seluk,” nia haktuir.
Nia aumenta, tanba agora ne’e mós sei iha faze diskusaun tanba espasu lei ne’e sei iha hela Prezidénsia Konsellu Ministru, hodi diskute modalidade saida mak tenke tau hodi inklui sira, ezemplu hanesan órgaun soberanu sira no sira seluk tan.
“Maibé ida ne’e mak diskusaun sira ne’ebé importante, no Governu mós kontinua rona opiniaun sira hotu liuliu Prezidente Repúblika, dehan presiza hasai ida ne’e no ba de’it ida ne’ebé, ita prontu foti desizaun ba opiniaun hirak ne’e hotu,” nia hakotu.
2,305 total views, 3 views today
Bele hare Video Seluk :