DILI (timorpost.com) — Ministeriu Ensinu Superior, Siénsia no Kultura (MESSK), liuhusi Diretora Jerál MESSK, Maria Filomena Lay, hamutuk ho Instituisaun Edukativa Kristal-Fundasaun Krista no Ensinu Superior Kristal (IEC-FC, ISC) abertura Ensinu Superior CUP 2022, hodi komemora loron Nasionál Ensinu Superior ba dalimak, ne’ebé Governu rekoñese iha loron 17 fulan Novembru 2017.
“Realizasaun jogu ida ne’e iha nia relasaun ho selebrasaun bo’ot ida ne’ebé MESSK tinan-tinan selebra iha dia 17 fulan Novembru, ne’e loron nasionál Ensinu Superior nian, maibé durante ámbitu ida ne’e Ministériu Ensinu Superior koordena ou servisu di’ak hamutuk ho instituisaun 18,” DJ MESSK Maria Filomena Lay, hafoin loke abertura Taxa Ensinu Superior CUP 2022, iha kampu ISC, Kinta (15/09).
Nia dehan, objetivu jogu ida ne’e mak sai hanesan enkontru ba estudante sira atu nune’e, hotu-hotu bele kria amizade entre instituisaun universidade ida-idak.
“Tinan kotuk ne’e ami hala’o de’it iha Sekretáriu Estadu Juventude no Desportu (SEJD) nia kampu, maibé ba tinan ida ne’e hakarak hadi’a liu tan ita nia kriasaun amizade,” nia dehan.
Nune’e Prezidente Ezekutivu IEC-FC, Agustinho Dos Santos Gonçalves, agradese ba Ministériu Ensinu Superior, Siénsia no Kultura, tanba Desportu ne’e importante, liuhusi atividade ne’e lori Unidade ba ema sira ne’ebé joga no ema sira ne’ebé suporta haksolok, hodi basa liman fó domin ba sira ne’ebé joga.
“Parabéns ba MESSK liuhusi DJ no Estrutura tomak ne’ebé realiza atividade ne’e, ita tenke kontinua la’o ba oin, atu nune’e estudante sira bele koñese malu, hodi lori domin no dame ba fatin hotu, tanba jogu ne’e mak lori domin no dame ba ema hotu-hotu no kria amizade entre joven sira atu la bele mosu konflitu,” nia hateten.
Enkuantu atividade ida ne’e mós iha ámbitu ida katak, Diresaun Nasionál Ensinu Superior Munisipál, liuliu ba iha atividade ida ne’ebé fó apoiu ba atividade destri kurikular. Partisipa iha jogu ida ne’e husi instituisaun Universitáriu 18, maibé tanba distánsia Institutu Politekniku Betano (IPB) ho Instutu Formasaun Professorres Baukau mak la partisipa.
Iha biban hanesan Magnifiku Reitor ISC, Sebastião Pereira, informa ohin halo abertura ofisiál ba atividade Ensinu Superior CUP 2022, ne’ebé mai hala’o atividade iha Instituisaun Edukativa Fundasaun Kristal ba volleyball husi Instituisaun Ensinu Superior sira akreditadu iha Timor-Leste.
“Ministériu Ensinu Superior hala’o atividade ne’e foin dahuluk mai iha IEC-FC, ami kontente hodi uza ami-nia Kampu Desportiva Cristal nian. Atividade ne’e la’o hodi komemora loron Mundiál Ensinu Superior nian, ne’ebe organiza husi MESSK ba Universidade hotu-hotu, atu partisipa para hala’o dezenvolvimentu iha siénsia no atividade sira seluk ne’ebé relasaun ho desportu nian,” Reitor ISC dehan.
Reitor ne’e hateten, atividade ne’e ba Universidade Akreditadu ne’ebé lokaliza iha Dili hamutuk 16 Universidade, rua mak la partisipa maibé loron ida sei partisipa.
Reitor realsa, primeiru sira mai halo abertura iha IEC-FC ne’e tanba iha pro-kontra entre Universidade sira.
Ba Unversitariu sira liuliu Instituisaun Ensinu Superior sira ne’ebé ba estudante sira ne’ebé partisipa ba atividade importante ida ne’e katak, atividade desportiva mak halo hotu-hotu sai Unidade, ida-idak nia relasaun entre Universidade sira ho instituisaun seluk.
“Ita joga desportiva halo ita-nia relasaun entre ita-nia Komunikasaun di’ak, atu prevene buat sira ne’ebé aat, agora la’o iha ita-nia rain desportiva, ita-nia amizade no relasaun mós sei di’ak liután no forma unidade sai ida de’it, atu ita bele halo kompetisaun ida di’ak liu,” Reitór hakotu.
3,020 total views, 3 views today
Bele hare Video Seluk :
Subscribe to Timorpost
