DILI (timorpost.com) — Xefe Estadu Maiór Jenerál Forsa Armada (XEMGFA), Tenente Jenerál Falur Rate Laek, enkontru regular ho Prezidente Repúblika (PR), José Ramos Horta, hodi relata servisu forsa operasaun nian.
Nia hatete, enkontru ho Xefe Estadu hanesan bai-bain mai fó hatene kona-ba situasaun rai laran hodi mantein operasionál forsa nian, kontrola forsa sira atu labele indixiplina, labele halo problema ho populasaun.
“Operasaun Konjuntu remata ona, hein atu halo relatóriu de’it, no avaliasaun. Operasaun Konjuntu ne’e atu kontinua ka lae depende ba situasaun, bainhira situasaun ameasa, kontinua no karik situasaun kalma ona remata,” nia dehan iha Palásiu Prezidensiál, Bairru-Pité, Sesta (16/09).
Nia dehan, atividade seguransa liuliu PNTL nian iha oras 24 no F-FDTL fó apoiu, maibé Forsa Polísia Militár F-FDTL nian nafatin kontinua patrulla atu bele kontrola militár sira labele la’o tun, la’o sa’e, ba mete tuun sa’e arte marsiais sira, labele ema tuda malu tama iha klaran, to’o ema tuda kona fali sira.
“Atu evita ema sivíl baku militár, ema hotu-hotu tenke iha konxiénsia no edukasaun di’ak hodi respeita malu no liuliu populasaun sivíl sira mós labele baku malu tun, sa’e, arte marsiais labele baku malu,” nia preokupa.
Nia aumenta, ohin loron sosiedade sivíl sira no instituisaun edukadór sira, inklui inan-aman no autoridade lokál sira eduka ona foin sa’e sira atu hakribi violénsia, para labele iha tan krime iha sosiedade nia leet.
“Forsa sira mós labele baku ema Sivíl arbiru, no ema Sivíl mós labele naran baku ema arbiru,” Tenente Jenerál Falur relata.
Enkuantu mensajen husi Prezidente Repúblika, José Ramos Horta nian mak, mantein operasaun forsa nian, mantein kontrola dixiplina forsa nian, atu labele halo problema sosiál ho komunidade.
1,667 total views, 3 views today
