Baukau(timorpost.com)—Prezidente Autoridade Munisípiu (PAM) Baukau louva Arte Marsiais Ikatan Kera Sakti-Putra Timor Leste (AM IKS-PTL), klube Inner Power suku Gariuai, postu administrativu Baukau Vila, tanba prienxe ona rekizitu hosi KRAM nasionál.
“Klube Inner Power Gariuai, ha’u haree sira prienxe ona rekizitu, tanba iha edifísiu prienxe ho meza no kadeira, komputadór sira hanesan instituisaun ida ke legal, iha hariis fatin feto nian no mane, uluk fou-foun harii buat ida la iha, maibé agora buat hotu iha”, Prezidente Autoridade Munisípiu Baukau, Olivii Freitas, ba Timor Post, hafoin remata partisipa serimónia Tomada de Pose ba Estrutura Klube Inner Power no Inaugurasaun Sede iha suku Gariuai, postu Baukau Vila, Sábadu (09/07).
Atuál Prezidente autoridade Baukau konsidera Organizasaun Arte Marsiais, konsidera hanesan desportu nasionál, tanba bainhira organiza didi’ak sai desportu nasionál fó oportunidade ba joven sira partisipa iha kompetisaun iha rai laran no mós iha rai li’ur.
“Tuir ha’u nia haree klube ida ne’e sufisiente ona, maibé karik sei iha falta ruma ha’u husu ba KRAM nasionál no Sub-KRAM Baukau atu fó hatene ba klube bele hadi’a di’ak liu tan iha futuru oin mai”, Olivio dehan.
Iha tempu hanesan membru sub-KRAM Baukau, Armindo Soares Ximenes, hatete, tuir observasaun Sub-KRAM munisípiu Baukau nia haree klube Inner Power suku Gariuai porsentu 75 prienxe ona sei falta porsentu 25 mak seidauk.
“Klube Inner Power setenta porsentu 75 sira prienxe ona, maibé ami kontinua rekomenda ba sira no ami mós mai kontrola para sira kompleta porsentu 100, maski la mensiona saida mak seidauk”, Armindo dehan.
Entretantu Koordenadór Inner Power suku Gariuai, Sebastião da Costa, hatete, atividade ne’ebé hala’o iha klube ne’e mak kompostu hosi tomada de pose ba estrutura hamutuk na’in-29, Inaugura sede klube Inner Power no fahe sertifikadu ba treinadór sira.
“Legalidade organizasaun tuir lei ne’ebé estadu fó liu hosi KRAM, ami kumpre no ami tenke kompleta rekizitu sanulu resin ualu, hahú hosi tomada de pose, halo sede no kampu treinamentu no selu-seluk tan”, nia dehan.
Membru klube Inner Power liu 600 ho ninia fatin treinamentu no sede estabelese iha aldeia Baha-Mori, suku Gariuai, postu Baukau Vila.
Hola parte iha serimónia tomada de pose ba estrutura klube Inner Power no Inaugurasaun Sede kompostu hosi PAM Baukau, reprezentante Sub-KRAM Baukau, komandante PNTL eskuadra Baukau Vila, xefe suku Gariuai, lideransa AM seluk.
2,232 total views, 3 views today
Bele hare Video Seluk :
Subscribe to Timorpost
