Dili (Timor Post)— Ohin loron ema hotu iha mundu inklui ema timor preokupa tebes ba lixu (sampah), iha Kapitál Dili laran, tanba ema seidauk iha konxiénsia umana nian ne’ebe diak hodi soe lixu tuir fatin ne’ebe mak Governu prepara ona.
Governu liu husi Ministériu Estatál halo esforsu makas tau osan hodi halao atividade ra’ut no dasa foer iha Sidade Dili, maibé ita sidauk redús soe foer arbiru ne’e, no lixu nafatin naklekar iha fatin-fatin iha kapitál Dili ne’e.
Defisiente, João Madeira hanesan vendedór ambulante ne’ebe fa’an sasán iha area Merkadu Lama hatete, fatin merkadu Lama ne’e ema barak mak halo movimentu ida ne’e, entaun rezulta lixu lekar arbiru.
“Ha’u hanesan defisiente no hanesan negosiante fa’an sasán iha ne’e, dala barak ha’u hare estudante sira mak soe foer arbiru iha fatin refere, maibé la’ós estudante de’it tantu ema bain-bain no inklui mós kondutór sira, la iha konxiénsia atu Soe foer iha fatin,” dehan Negosiante, João ba Media Online Timor Post iha eis merkadu Lama, Kinta, (23/06).
Maski, la iha lixu fatin maibé hanesan umanu no hanesan ema, iha konxiénsia para Soe foer iha fatin, la bele hanoin katak lixu fatin la iha entaun naran soe foer arbiru tuir hakarak.
“Too agora, ema barak mak seidauk hatene Soe foer iha lixu, ita hare iha nasaun sira seluk, ema nia fatin ne’e mós, no iha regra katak tenke Soe foer iha nia fatin, ita ema ne’e la bele ema seluk mak fó hanoin ba ita hafoin ita Soe foer iha nia fatin maibé presiza konxiénsia husi an, ida ne’e hatudu ona ita nia moral diak hadomi ambiente,” nia informa.
Iha parte ida mós, nia husu governu liuhusi Presidente Autoridade Munisípiu Dili atu hare iha kapitál Dili, karik iha parte ne’ebé mak la iha lixu fatin, atu distúrbiu lixu fatin iha fatin refere, hanesan iha Eis Merkadu Lama ne’e iha duni lixu fatin maibé tanba dook, husi populasaun sira halo movimentu ba mai, ikus mai ema soe tuir nia hakarak de’it.
“Durante ne’e, ha’u hare sira saneamentu sira mai dasa, maibé populasaun kontinua soe foer iha fatin refere, dala ruma lixu fatin dook ne’e sira baruk, no soe foer iha ne’e,” nia dehan.
Tanba ne’e hanesan sidadaun ida ba rai ne’e, hakarak husu ba Governu tau lei ne’ebe rigorozu atu nune’e ba populasaun sira ne’ebe soe lixu arbiru tenke aplika sansaun ruma atu sira ta’uk no labele soe lixu arbiru. Nia hateten.
Tuir observasaun media Online Timor Post iha terrenu hare katak, los duni eis Merkadu lama kontinua lixu lekar iha fatin-fatin, nune’e mós lixu fatin iha merkadu Lama mós la sufisiente. Hakotu.
2,734 total views, 6 views today
Bele hare Video Seluk :
Subscribe to Timorpost
