DILI, (timorpost.com)—Xefe suku Madohi, Bernardino de Cristo Ferreira, aviza ba komunidade atu hamoos foer iha ida-idak nia bairru hodi evita-an liuliu labarik sira husi moras denge.
“Nu’udar autoridade suku, ha’u iha responsabilidade atu aviza ha’u-nia povu, husi bairu ida ba bairu seluk, atu ida-idak hamoos nia bairu, ida-idak nia uma ninin, tanba udan monu rai susuk barak, ita sei afeta moras denge”, Bernardino de Cristo Ferreira, nu’udar xefe suku iha postu administrative Dom Aleixo ne’e informa ba Timor Post hafoin aviza tama sai aldeia area suku Madohi nian, Domingu, (07/01).
Nia hatutan, “Ita aviza ba bairru-bairru, atu haoos bee-dalan sira besik uma, labele soe fo’er ba baleta hodi intupidu depois hamosu inundasaun. Ha’u hanoin di’ak liu povu mak iha konsiénsia atu hadook-an husi moras, ita hatene Estadu, Governu fó tratamentu gratuita, mais ita moras ona sei afeta kustu no sira seluk, entaun di’ak prevene atu labele afeta moras denge”.
Autoridade lokál ne’e mós husu ba parte ministériu saúde hodi fasilita rega aimoruk ba fatin sira ne’ebé sai risku ba moras denge iha suku Madohi inklui iha suku seluk, atu nune’e labele afeita ba komunidade nia saúde.
Iha suku Madohin rasik, xefe suku ne’e identifika susuk barak liu ne’e mak iha área Terra Santa tasi-ibun nian, Beto tasi, Lagoa Tasi-Tolu.(*)
2,706 total views, 3 views today
Bele hare Video Seluk :