MANUFAHI (Timor Post) — Administradór munisípiu Manufahi, Arantes Isaac Saramento informa, to’o agora laiha fasilidade ba teste swab ba surtu Covid-19. Nia konsidera situasaun ne’e sériu tebes no husu governu sentrál nia atensaun.
“Bainhira komunidade sira hakarak halo viajen ba Dili tenki ba halo teste swab iha hospital referral Maubisse, Covalima no mós ba hasai fali iha Dili, ida ne’e sai preokupasaun boot ida,” Arantes hato’o kestaun ne’e iha Salaun Administrasaun Munisipál, Sesta (23/07) bainhira enkontru ho Ministru Administrasaun Estatal ho ekipa.
Nia dehan, preokupasaun ne’e sai problema ida ba munisípiu tanba laiha laboratorium ida hodi halo teste Covid-19 iha munisípiu no konstrusaun fatin izolamentu ba Covid-19 atraza no ida ne’e tanba situasaun maibé bainhira moras aumenta susar tebes.
“Enkuantu ba manutensaun karreta iha munisípiu mós sai problema tanba laiha offisina ida hodi haree no jere karreta ambulánsia sira tanba karreta bai-bain la hanesan ho karreta ambulánsia”, nia dehan.
Presiza offisina ida hodi kontrola karreta sira nune’e hadi’a lalais bainhira kondisaun la di’ak, karik la hadi’a bele fó impaktu banhira viajen lalais tula pasiente no ida ne’e sai mós problema. (lcl)
722 total views, 3 views today
Bele hare Video Seluk :