Jornalista Olga Soares / Editór Noémio Falcão
DILI (Timor Post)—Governu no povu Austrália liuhusi Embaixadór iha Timor Leste Peter Robert, ofisialmente entrega vasina ho marka AstraZeneca hamutuk rihun atus tolu (3) ba Primeiru Ministru Taur Matan Ruak.
Serimónia entrega hala’o iha loron Kuarta (11/08/2021) iha edefísiu SAMES, Kapu Alór, Dili.
Iha diskursu Primeiru Ministru Taur Matan Ruak, agradese ba povu no Governu Austrália.
Taur subliña, servisu hamutuk ida ne’e ho objetivu prinsipál maka avansa lalais normalizasaun iha país.
Tuir Taur, COVID-19 sei la lakon no nia sei hela nafatin dezenvolve too nia hetan mutuasaun variante seluk no depende ba variante hirak ne’e ninia nivel agresebilidade aumenta no kontinua afeta nafatin povu.
“Lori ha’u nia-an ha’u nia naran rasik, no lori oitavo governu konstitusionál no Estadu no povu Timor Leste nia naran tomak hato’o agradesementu espesial, ba governu Austrália Sr. Primeiru Ministru Morrison liu hosi Embaixadór Austrália iha Timor Leste,” Xefe Governu subliña.
Nia hatutan, moras COVID-19 provabelmente sei konsidera hanesan moras baibain no ema hotu sei moris hamutuk ho nia too tempu naruk, maibé ho kampania vasinasaun ne’ebé hanesan dalan ida hodi minimiza risku ba sidadaun sira nune’e lori ema hotu ba faze normalizasaun .
“Tanba ita define ona pursentu 70, atu ita fila ba normalizasaun, hosi pursentu 70 ne’e se populasaun hetan hotu vasina,” Taur dehan.
Enkuantu Ambassador Austrália iha Timor Peter Robert, haksolok tanba vasina hosi Austrália bele too iha Timor Leste. Tanba ne’e nia fó parabéns ba Primeiru Ministru, Ministra Saúde hamutuk hodi fornese vasina Corona virus iha nasaun no iha TL.
“Implementasaun vasina iha rai laran di’ak ho atendimentu di’ak tebes. Tanba ne’e ha’u kontente ita bele hamutuk hodi simu tan vasina AZ ho doze rihun atus tolu no iha fulan oin mai ita sei kontinua simu tan vasina AZ , rihun atus rua adisional hosi Austrália,” Diplomata ne’e subliña.
Dipolomata ne’e salienta katak ho kontribuisaun hirak ne’e Austrália sei fornese vasina maizumenus rihun atus hitu nolu resin.
“Vasina mak dalan ikus hodi kontra funu pandemia ida ne’e. Tanba ne’e ha’u espera katak vasina ne’ebé sei mai tan sei aselera kobertura vasina ba populasaun ho tarjeitu iha tempu badak nia laran,” Peter Robert espera.
Tanba Khan mundu tomak vasina AZ hatudu provas katak AZ seguru no efetivu.
“Vasina doze daruak fó protesaun exelente ba Variante Delta ne’ebé foin deteta daudauk iha TL. Tanba ne’e ba populasaun labele para ho simu doze dahuluk de’it. Tanba ne’e ha’u nia parabéns ba governu no ba ema ne’ebé servisu iha area saúde,” Diplomata ne’e agradese tan.
Enkuantu Ministra saúde Odete Maria Freitas Belo, hatete governu liu hosi MS durante ne’e simu ona vasina ho diferente, TL iha vasina AZ, Sinovac produtu rua ne’e Ministériu saúde administers ona 577.685 mil doze no konsege administra ona rihun atus 4 resin ba komunidade
“Hosi númeru ne’ebé ita iha inklui ona rihun 35 vaile ne’ebé mak ohin ita hala’o termu entrega hosi governu Austrália mai iha ita nia rain , enkuantu vasina ne’ebé ita simu, la’ós vasina de’it maibé mai mós kompleta ho ninia konsumaves sira hanesan jaringan ho algudaun sira,” Odete relata. (Lee notísia seluk iha Jornal Timor Post)
1,173 total views, 3 views today
Bele hare Video Seluk :
Subscribe to Timorpost
