DILI, (timorpost.com)— Primeiru Ministru (PM) Kay Rala Xanana Gusmão, hatete Governu sei diskuti no haruka proposta alterasaun lei kriasaun Komisaun Anti Koorupsaun (KAK), ho númeru 08/2009 ba Parlamentu Nasionál (PN) atu nune’e bele halo eleisaun ba komisáriu KAK nian, tanba durante ne’e laiha konsensu entre bankada partidu sira iha PN.
Nia espelika, tanba iha lei KAK ne’e define katak atu eleisaun ba komisáriu KAK tenke priense korum ho mínimu deputadu 43 prezensa mak foin bele halo eleisaun ba komisáriu foun.
“Horbainrua (Tersa,19/03) iha Parlamentu Nasionál vota kona-ba proposta ida, maibé partidu opozisaun sai tiha de’it, tanba iha lei kona-ba KAK nian ne’e, tenke iha mínimu 43 hafoin priense korrum, lae labele diskuti kona-ba komisáriu KAK”, dehan Primeiru Ministru (PM), Kay Rala Xanana Gusmão, ba jornalista sira hafoin remata enkontru ho Prezidente Repúblika iha Palásiu Prezidensiál, Bairru-Pité, Kinta, (20/03).
Xefe Governu hatutan, “Horseik Vise-Ministru Asuntu Parlamentár, Adérito da Costa Hugo, apresenta ona ba ha’u no iha semana ne’e mai, Governu sei diskute no haruka ba Parlamentu Nasionál atu altera tiha lei KAK nian, nune’e ho maioria simples de’it bele vota ba komisáriu KAK”.
Antes ne’e, bankada FRETILIN husu Governu no Parlamentu Nasionál (PN) atu halo uluk altersaun bá Lei KAK hafoin bele hakat ba eleisaun komisáriu foun.(*)
2,325 total views, 3 views today
Bele hare Video Seluk :