COVALIMA—Prezidente Partidu Kongresu Nasionál Rekonstrusaun Timorense (CNRT-sigla portugés), Kay Rala Xanana Gusmão, deklara katak adeus konflitu benvindu dezenvolvimentu.
Lider karizmátiku ne’e, hato’o ba militante no simpatizante partidu CNRT iha munisípiu Covalima, hafoin hala’o kampaíña aberta ba Eleisaun Parlamentár, ne’ebé realiza iha kampu futeból munisípiu Covalima, Sesta loro-kraik (28/04/2023).
“Adeus konflitu benvindu dezenvolvimentu, ita la moris iha pas no estabilidade nia laran dezenvolvimentu sei la to’o,” nia kompromete.
Xanana konta, nu’udar partidu polítiku, bainhira povu hili, atu kaer ukun hakarak halo saida ba povu no rai ne’e, tanba povu presiza dezenvolvimentu.
Tanba dezenvolvimentu hahú hosi tinan 2011 la’o neineik to’o agora, ohin loron balun dehan, lori naroman ba povu, maibé planu estratéjiku ba dezenvolvimentu laiha.
“Ita hakarak salva ita nia Estadu Direitu Demokrátiku, povu mak hili, povu mak manda liuhosi direitu, nune’e halo saida de’it tenke tuir regra, norma no lei, se la halo tuir lei Estadu la’o laloos ona”, nia esplika.
Nia rekoñese CNRT ukun tinan 10 nia laran gasta osan povu nian (Orsamentu Jerál Estadu) biliaun 10 USD, hodi instala eletrisidade, konstrui Estrada no ponte iha territóriu nasionál.
Maibé, haree ukun oitavu Governu konstitusionál ne’ebé hetan viabiliza laiha planu estratéjiku, maibé gasta osan barak, uza osan povu nia mais laiha relatóriu.
Entretantu, militante no simpatizante munisípiu Covalima kompromete atu fó vitória absoluta ba partidu Kongresu Nasionál Rekonstrusaun Timorense (CNRT-sigla portugés), iha Eleisaun Parlamentár.
“Ita garantia fó vitória absoluta ba partidu CNRT, hodi ukun iha tinan 2023-2028, tempu to’o ona, ita atu lori maun boot Xanana Gusmão ba Primeiru Ministru,” Koordenadór Partidu CNRT munisípiu Covalima, Saul Salvador Amaral, deklara liuhosi diskursu ne’ebé hala’o kampaíña aberta iha kampu futeból Suai, Sesta loro-kraik (28/04/2023).
Koordenadór ne’e rekoñese lider karizmátiku hadomi povu, lider ida ne’ebé la kolen ba ninia povu, ne’ebé loron 21 fulan Maiu militante no simpatizante tuu ba númeru 12. Se la’ós agora bainhira tan.
Molok hahú kampaíña eleitorál, Prezidente Partidu CNRT, Kay Rala Xanana Gusmão, hamulak hodi temi martires sira, nune’e bele hamutuk ho povu, atu hadi’a nasaun no povu nia moris.
Nune’e mós hamulak atu matebian sira bele fó mahon ba militante no simpatizante partidu CNRT nian, ne’ebé habai-an atu hein diskursu hosi Xanana Gusmão.
Hafoin hamulak ekipa Bombeiru munisípiu Covalima nian, lori karreta tanke hodi rega, apoiante munisípiu Covalima nian, ne’ebé habai-an iha kampu futebol Ladi Suai Vila.
4,337 total views, 3 views today
Bele hare Video Seluk :
Subscribe to Timorpost
