Díli (timorpost.com) – Prezidente Partidu CNRT, Kay Rala Xanana Gusmão, garante vitória iha eleisaun lejizlativa tinan 2023, sei hakotu problema ne’ebé nasaun hasoru no korriji violasaun oi-oin ne’ebé akontese durante governasaun atuál.
“Se povu sente iha tinan ne’e nia laran buat ida la akontese iha ita-nia rain, entaun ba vota CNRT, tanba iha programa atu aprezenta ba parlamentu no sei dehan halo saida”, nia hateten, iha konsolidasaun ne’ebé hala’o iha Suku Dare, Domingu (05/02).
Nua mós nota katak, Governu agora laiha planu ezekusaun, tanba Orsamentu Jerál Estadu tinan 2023, gasta la tuir normas.
“Tinan ida ne’e, tres billiaun, halo saida, fó de’it ba ema balun, atu sosa karreta foun, tanba atu sai, laiha planu. Agora CNRT ba fali, tanba iha 2017 interrompe tiha, bá mak haree fila-fali, saida mak halo no saida mak seidauk halo, agora ne’e atu halo oinsá,” Fundamenta Xanana.
“Karik, ama-apa sira hatene, oinsá aplika osan mina-rai iha orsamentu, imi sai hirus tan, fundu COVID to’o agora gasta hira seidauk hatene, sesta bázika la hatene, sé mak simu osan la relata, seidauk aprezenta konta, Tribunál karik simu husi kotuk, nonok hela de’it”, relata Prezidente CNRT.
Tuir lider istóriku ne’e, sistema CNRT monta no hetan elojia husi komunidade internasional mós agora hakdasak.
“Husi 2007 to’o 2012, laiha sistema, CNRT mak monta, hadi’a, hodi ita-nia sistema ne’e la’o ho di’ak, komunidade internsional kontente tebes, husu atu mantein, maibé agora estraga tiha, ohin to’o ne’ebá la hatene buat ida, rona de’it muda tun, muda sa’e, ita tau osan uitoan daudauk ona, husi fundu mina-rai, husi povu nian ne’e, monu de’it”, fundamenta Xanana.
Tanba ne’e, CNRT hakarak minimu kadeira 33, hodi garante estabilidade Governu, hodi evita koligasaun ho partidu seluk hodi forma Governu, tanba senáriu polítika ne’e dala-barak halo ulun moras.
“Karik hakarak muda problema ida ne’e, hakotu tiha ne’e, problema krize ida ne’e, ita vota ba CNRT, lalika hanoin vota ba Avo Nana, la’e! Avo Nana ne’e membru ida, tanba CNRT nuudar partidu, iha tiha ona ninia planu, ninia vizaun, atu bele hala’o tuir”, tenik Xanana.
Ho estabilidade governativa, mak Kay Rala Xanana Gusmão, kompromete atu iha governasaun ne’ebé hadi’a liu tan povu no nasaun nia vida.
“Atu salva buat sira ne’e, tanba partidu CNRT, interesse povu no nasaun nian, foti a’as liu interese partidu, tan foti as liu mak iha 2014 ha’u sai husi Primeiru-Ministru, fó Primeiru-Ministru ba ema seluk, hodi ha’u bele defende interese nasionál, defende tasi, hodi ita mana’an tiha Australia,” Rekorda Prezidente Partidu.
Xanana hatete, partidu CNRT iha vizaun polítika ne’ebé diferente ho partidu seluk, tanba iha planu definidu ona no implementa gradualmente dezde tinan 2012.
Kay Rala Xanana Gusmão relembra katak, CNRT abandona Governu, tanba partidu KHUNTO no PLP lakohi rona alerta husi CNRT katak, akontese violasaun oi-oin.
Nune’e, CNRT retira husi Governu atu katak, partidu iha prinsípiu ida, hodi tane a’as interesse nasionál, duké interesse partidu nian no la’ós atu buka poder ka oportunidade, maibé determinadu hodi serbi’i povu no nasaun.
“Bolu atensaun, ida ne’e labele, la estraga ita-nia sistema, viola ida ne’e, (PLP no KHUNTO) hatan lae agora ha’u mak primeiru Ministru, ida uluk ne’e uluk, agora ne’e ha’u mak kaer Governu, la rona, estraga ami labele halo buat ida, nu’udar prinsípiu iha partidu ida ne’e, tane a’as interese nasionál, duke interese partidu nian, imi lakohi rona ami sai”, relembra Xanana.
2,413 total views, 3 views today
Bele hare Video Seluk :