Dili(timorpost.com)—Prezidente Partidu Demokratiku (PD), Mariano Assanami Sabino, dehan PD mehi ba oin Parlamentu Nasional (PN) tenke sai fatin konsentrasaun hanoin ka ideia, maske partidu ida hetan kadeira ida ou rua iha PN, maibé presiza mós nia hanoin hodi tau hamutuk.
“Ita hotu tuir eleisaun, bainhira eleisaun ona ida manan ida tenke lakon no balun la liu bareira, maske kadeira ida ou rua deit iha PN nia reprezenta povu, presiza iha hanoin no idea hamutuk”, Mariano Assanami Sabino, iha nia intervensaun ba dala ikus iha Plenaria, Segunda (19/06).
Nia hatete, PD sempre mehi ba oin katak PN tenke sai fatin konsetrasaun, ideia no hanoin i liuliu tenk halakon ona arogansia.
“Ita mak manan ema seluk mak lakon, halakon ona ditadura maioria Parlamentar ne’ebé katak, ida maioria ne’e mak loos hela de’it, maibé diskusaun klean mak importante”, nia tenik.
“Maske ita bankada governu, ita husik hela atu membru governu ida defende klean oinsá orsamentu, oinsá programa, oinsá implementa no oinsá mak ita kontrolu, tanba buat tolu ne’e sei di’ak nafatin ba Timor Leste”, dehan Prezidente PD.
PD mós iha situasaun ne’e la’o ona durante tinan 24 se konta hosi 1999, tempu ida naruk tebtebes, se konta hosi tinan 2002 PD tinan 21 ona, tempu ida ne’ebé ke naruk.
“Ita bele halo refleksaun no bele haree polítika ida ne’ebé presiza ba postura Deputadu foun ne’ebé halo no postura governasaun ne’ebé halo ba oin”, nia hatete.
Nia dehan, tempu ona atu kurizi saida mak halo tiha ona, kurizi la’ós tanba ukun, la’ós mai ezekutivu de’it, maibé kurizi ba instituisaun hotu, kurizi ba ema ida por ida, kurizi ba nia mentalidade.
Nia deklara katak agora tempu ona atu Timor-Leste kompete ho Nasaun seluk, tanba durante ne’e TL liu eleisaun komete iha dapur laran de’it.
“Tempu ona atu ita haree Timor-Leste ida ke forte, saudavel hodi ita bele kompete ho rai seluk, la’ós TL ida ne’ebé eleisaun remata ita kompete iha dapur laran de’it, maibé Timor ida ne’ebé ita tenke kompete ho rai liur”, nia subliña.
3,123 total views, 3 views today
Bele hare Video Seluk :