DILI— Xefe Departamentu Apoiu no Kolaborasaun Servisu Espesializadu iha Ministériu Saúde, Nilton da Cruz, hatete, loron 25 fulan-Marsu 2023, Ministériu Saúde liu hosi Diresaun Nasionál Apoiu Servisu Ospitalar (DNASO), sei kontinua konsulta medika espesializada ba veteranu no antigu Kombatente Libertasaun Nasionál iha Munisípiu Manatutu.
Atividade outreach médiku espesializada ne’ebé organiza husi Departamentu Apoiu no Koordenasaun Servisu Espesializada (DNASH) servisu hamutuk ho médiku espesialista husi Hospital Nasionál Guido-Valadares (HNGV) iha Munisípiu Manatutu ho objetivu atu dignifika veteranu sira nia sakrifísiu, garantia atendimentu saúde veteranu no Antigu Kombatente Libertasaun Nasionál.
“Iha tinan ida-ne’e iha ona planu hamutuk ho Ministériu Kombatente Libertasaun Nasionál, semana tuir mai iha loron 25 Marsu sei kontinua halo konsulta medika espesializada ba ita nia veteranu no antigu kombatente libertasaun nasionál sira iha munisípiu Manatutu”, nia dehan ba Jornalista iha Novo-Turizmu, Kuarta (15/03).
Nia haktuir, konsulta espesializada hetan apoiu husi médiku espesialista sira HNGV liu-liu moras fuan, gastritis ka moras estomuk, inflasaun iha tilun ka kapasidade auditivu menus, inflasaun iha tilun no garganta.
Problema iha matan hanesan haree dook ka besik la mós, problema iha ruin inklui bala musan iha veteranu nia isin-lolon no mós moras kulit.
Konsulta espesializada ba veteranu sira importante tebes, atu haree moras ne’ebé sira enfrenta iha tempu ne’ebá, tanba ne’e lori médiku espesialista sira ba komunidade sira ligadu ba veteranu sira.
“Tanba ne’e, ami halo ona koordenasaun ho Hospital Nasionál Guido Valadares mak apoiu médiku espesialista no mós koordenasaun ho sentru matan nian, hanesan ita nia veteranu ne’ebé idade avansadu ona presiza tratamentu ba moras matan nian”, esplika nia.
Iha atividade ne’e, bainhira deteta hetan pasiente ne’ebé problema iha matan haree dook ka besik la mós, ekipa halo kedas intervensaun fahe oklu gratuita, nune’e mós sira ne’ebé problema ruin ka kotuk moras simu kedas tratamentu ho fizioterapia.
Nia esplika, bainhira ekipa deteta hetan moras maibé labele halo intervensaun hanesan katarata, extrae ka hasai bala musan no operasaun ba lipoma inklui moras fuan no moras sira seluk, ekipa koordena ho saúde munisípiu halo transferénsia mai Hospital Nasionál Guido Valadares (HNGV) nune’e bele hetan tratamentu.
Antes ne’e atividade halo ona iha munisípiu rua hanesan, Likisá no Aileu maibé ho númeru ne’ebé la hanesan, iha Munisípiu Likisá ekipa konsege halo tratamentu ba veteranu kuaze hamutuk 446 no Aileu na’in-366 inklui veteranu 15 halo kedas transferénsia mai Hospital Nasionál hodi hetan intervensaun tratamentu.
“Ami mós konsege halo intervensaun ba veteranu ida hasai bala musan iha nia ain, tanba iha momentu ne’ebá hetan apoiu husi sentru saúde munisípiu Aileu no Likisá bainhira iha fasilidade apropriadu halo intervensaun entaun halo kedas iha fatin”, nia hakotu.
1,438 total views, 3 views today
Bele hare Video Seluk :
Subscribe to Timorpost
