Dili (timorpost.com)—Mandatu Oitavu Governu Konstitusionál sura de’it fulan no remata ona, maibé estrada ne’ebé mak ligasaun hosi Postu Administrativu Remexio ba suku Tulataqueu no suku Faturasa, tinan ba tinan aat ba beibeik.
“Ami hanesan komunidade suku Tulataqueu no suku Faturasa hakarak husu ba oitavu governu atu tau matan hela ba ami nia estrada ne’ebé mak ligasaun hosi Postu Administrativu Remexio mai iha ami suku rua ne’e kondisaun grave ne’e no difikulta transporte hodi tula komunidade sira nia produtu ba Merkadu, Remexio no Dili”, dehan Daniel de Jesus Mendonça ba Timor Post Via Telefone, Tersa (21/03/2023).
Nia hatete, produtu loka iha suku Tulataqueu no suku Faturasa barak maibé transporte atu transfere produtu sira ne’e ba merkadu mak difisil, tanba kondisaun estrada grave tebes, tahu halo karreta tama sai ladi’ak.
“Produtu lokál ne’ebé mak ami suku rua ne’e iha mak hanesan modo, sabraka, fehuk, ai farina, hudi, ai-nanas no Bani been maibé susar ami atu lori ba merkadu”, nia hatuir.
Aleinde ne’e mós tempu besik ona atu eleisaun estrada mós bele fó impaktu ba transportasaun material eleisaun parlamentár ninian.
“Tanba ne’e husu ba governu fó orientasaun ba IGE hodi lalais tiha estrada sira ne’e atu nune’e iha labele difikulta ba karreta ne’ebé mak tula material eleisaun nian mai iha ami suku rua ne’e, tanba estrada ba suku rua ne’e grave tebes”, nia husu.
Tuir loloos ne’e, sábadu no domingu ne’e governante sira tenke la’o sai hosi sidade Dili hodi ba haree besik kondisaun estrada sira ne’ebé mak aat halo komunidade sira halerik hela.
“Labele kampaña mak imi mai hodi promete buat barak-barak ba povu dehan, karik ami manan ami sei halo ida ne’e ida ne’ebá, eleisaun remata manan hodi sa’e ba kaer ukun lia fuan sira promete iha kampaña ne’e lakon tiha”, nia ko’alia.
Nia dehan, povu ne’e nia hakarak mak estrada, eletrisidade, bee moos, saúde no edukasaun, kuandu buat sira ne’e mak kompletu sira sei la ezije tan ona.
1,160 total views, 3 views today
