Dili (timor post.com)—Asis dos Santos, hanesan ema ho Defisiénsia orgullu ho autoridade destakadu iha sentru votasaun, ne’ebé sempre fó prioridade ba nia atu ezerse ninia Direitu de votu iha eleisaun parlamentár 2023.
Sentimentu orgullu ida ne’e, Asis dos Santos hato’o ba Timor Post hafoin ezerse ninia direitu votu iha sentru votasaun Eskola Ensinu Báziku Sentrál Faról, Suku Motaél, Postu Vera Cruz, domingu, 21/05.
“Fatin ida ne’e ha’u mai vota dala rua ona, ha’u mai vota sempre hetan prioridade, tanba ha’u ema ho defisiénsia, maibé ha’u konsidera autoridade sira nia preparasaun di’ak tebes-tebes atu atende ami sira ne’ebé ho defisiente”, Defisiente Asis informa.
Asis hatete, nia direitu votu iha sentru votasaun eskola Bázika Sentrál Faról ne’e dezde Indonézia nia tempu, nune’e mós Timor-Leste hafoin restaura Independénsia mós konsentra sentru votasaun iha eskola Faról, ne’ebé fatin ne’e di’ak ba ema defisiénsia sira hodi ezerse sira nia direitu votu ho di’ak.
“Indonézia nia tempu mós halo eleisaun iha ne’e, ita Independénsia mós halo eleisaun da-tolu, ka da-haat iha ne’e, ne’ebé fatin ne’e efisiente tebes-tebes”, Asis hateten.
Tanba ne’e, nu’udar ema ho Defisiénsia sente orgullu, maski nia enfrenta moras, maibé partisipa eleisaun da-rua, Eleisaun Prezidensiál ho eleisaun Parlamentár, hodi hili membru parlamentu sira atu define Primeiru Ministru.
“Ha’u nia esperansa, mak ba ha’u nia oan, ha’u nia bei oan sira, maibé ha’u nia oan sira idade boot hotu ona, sira ema intelektuál hotu, maibé sira nia oan ne’e mak seidauk prepara di’ak atu bele simu futuru ida ne’e, futuru iha ha’u nia bei oan sira ho ita boot sira foin sa’e nia liman”, Asis esplika.
Ne’e duni tuir nia katak, esperansa tenke hahú ka komesa ohin ba oin, labele hein esperansa, ita toba hela de’it depois mak esperansa ne’e mai, labele.
1,810 total views, 3 views today
Bele hare Video Seluk :