DILI—Organizasaun Naun Governmental Fundasaun Mahein (FM) husu ba Komandante Jerál foun Polisia Nasionál Timor-Leste (PNTL) atu haree fila fali kazu sira ne’ebé mak seidauk rezolve.
Diretór ezekutivu FM, Abel Amaral, hatete nia parte hato’o parabéns ba Komandante Jerál no Segundu Komandante Jerál foun ne’ebé mak Governu fó fiar atu lidera Institutuisaun PNTL.
“Hakarak hato’o ba Komandante Jerál no Segundu Komandante Jerál foun bele haree fila fali kazu sira ne’ebé mak iha sira nia mandatu seidauk rezolve para nune’e, bainhira sira toma responsabilidade foun ida ne’e, oinsá mak sira atu bele haree ka aselera ninia prosesu,” Abel haktuir ba Jornalista sira iha nia knaar fatin Akadiruhun, Kinta (16/03).
Tanba Komandante Jerál no Segundu Komandante Jerál, sira na’in-rua ne’e eis Komandante Munisípiu Dili, tanba ne’e sira iha esperiénsia iha sira ninia Komandu ne’e rasik. Ne’ebé iha buat barak mak sira halo di’ak ona, maibé buat balu seidauk di’ak.
Tanba ne’e, públiku apresia durante sira nia Komandu, maibé públiku mós lamenta iha sira nia Komandu tanba iha buat balu mak seidauk la’o loos.
Nia dehan, mezmu ke iha kazu balu hanesan kazu Bernardo ne’ebé mate iha Sela Polísia, ne’e to’o agora ema hotu-hotu seidauk hatene ninia prosesu ne’e la’o oinsá ona.
Ho ida ne’e mós iha momentu ne’ebá, sei iha Komandante Henrique nia tempu, maibé ikus mai prosesu sira ne’e seidauk iha rezultadu. Ne’ebé Governu fó fiar ona ba eis Komandante Munisípiu Dili atu assume Komandante Jerál PNTL foun, maibé presiza haree kazu sira ne’ebé mak seidauk rezolve.
“Ita husu ba Komandante Jerál foun, atu bele haree fila fali prosesu sira liuliu ba kazu sira ne’ebé mak durante ne’e komunidade preokupa hela, liuliu família vítima, espesialmente ba kazu Bernardo ne’ebé mate iha sela Polísia to’o agora família vítima hein hela rezultadu Bernardo nia mate, mate tanba oho-an ka mate tanba kazu buat seluk ruma,” nia kestiona.
Nune’e, FM husu ba Komandante Jerál no Segundu Komandante Jerál ba oin atu bele nakloke no loke-an ba públiku atu bele halo enkontru hodi bele troka ideia ka hato’o lamentasaun sira ligadu ho servisu PNTL ninian.
Enkuantu, ho nomeiasaun ida ne’e, eis Komandante Munisípiu Dili na’in-rua mak sai komandante Jerál, entaun ida ne’e responsabilidade ida atu oinsá mak na’in-rua bele deskobre prosesu sira ne’e para família vítima no mós públiku bele hatene katak prosesu ne’e to’o ona iha ne’e no autór mak ida ne’e ou kauza Bernando mate tanba hanesan ne’e.
“Tanba ne’e ita fiar lideransa na’in-rua sei haree servisu sira ne’ebé mak iha tinan kotuk seidauk rezolve, nune’e ida ne’e sira na’in-rua tenke iha obrigasaun atu rezolve,” nia hakotu.
338 total views, 18 views today






