DILI (timorpost.com) – Komandu Polisia Nasionál Timor-Leste (PNTL) Munisípiu Dili, durante semana rua rejista Insidente Krime hamutuk 24 iha area jurídiku Kapitál Dili.
Komandante PNTL Munisípiu Dili, Superintendente Xefe Polisia, Henrique da Costa, hatete duarante semana rua hahú husi loron 05-18 Fulan Setembru Tinan ne’e, sira rejista insidente krime hamutuk 24.
Nia dehan, hafoin sira hetan despaxu husi Komandu PNTL, hodi nune’e sira ezekuta orden komandu nian, komandu Munisípiu Dili hetan apoiu husi Komandu Jerál, Unidade Espesiál Polisia (UEP) Unidade Polisia Maritima (UPM), Unidade Polisia Fronteira (UPF) no inklui mós Polisia Militár (PM), hodi halo atividade operasional, hanesan halo aproximasaun no prevensaun no reprezensaun iha Kapitál Dili nian.
Nune’e, halo atividade hanesan patrolia lao ain, patrolia ho karreta ho patrolia ho motor, Intensaun husu atu nune’e ema hotu kontribui ba iha paz no estabilidade iha Munisípiu Dili nian.
“Nune’e, iha semana rua nia laran iha loron 05 too 18 Fulan Setembru tinan 2022, ita rejista insidente krime hamutuk 24,” dehan Henrique da Costa iha nia knaar Kaikoli Dili, Kuarta (21/09).
Husi kazu hirak ne’e, mak sira parte hato’o keixa ba iha Ministériu Públiku hodi prosesa.
“Iha mós insidente sira ne’ebé ita la rejista ba iha Ministériu, tanba banhira sira tuda malu patrolia sira to’o iha fatin no dala-ruma sira halai lakon no dala-ruma sira vítima sira la kohi hato’o keixa entaun ita la kontinua prosesu,” nia konta.
Maibe, medida prevensaun ne’e Komandu PNTL Munisípiu Dili sei kontinua nafatin halo.
“Krime ne’ebé ita rejista ne’e, husi eskudra Dom Aleixo mak barak liu no tuir mak eskuadra Vera-Krus,” nia dehan.
Nia hatutan, sira parte halo komparasaun iha Fin Agostu nian ne’e, sira rejista krime ne’e aas, tanba 27 kasus, maibé iha tempu ne’ebá, sira halo operasaun la másimu, tanba rekursu mak la sufisiente, menus, maibé daudaun ne’e rekursu barak para halo atividade prevensaun, ita bele reduz krime 50 %.
“Krime ne’ebé ita rejistu ne’e barak liu mak asaltu no ameasa sira ne’e mak númeru aas mezmu ke fó ameasa makas liu no fó ameasa ba ita-nia komunidade sira pániku, entaun ita tenke halo prevensaun makas,” nia dehan.
Alende ne’e nia dehan, kazu violasaun domestika ne’e mezmu ke sira halo operasaun makas no la halo operasaun, maibé nia númeru ne’e kontinua nafatin aas, tanba ne’e uma-kain sempre iha problema.
1,425 total views, 6 views today
