DILI ( timorpost.com)—Tribunal Judisiál Primeira Instánsia Dili (TJPID), liuhusi Juis turnu Ersila de Jesus deside aplika medida koasaun Preventiva (PP) ba arguidu nain-3 ho naran inisiál MMH, ET no AM, tanba envolve iha krime roubo, ne’ebé deskonfia uza karreta luxu hodi ba na’ok sasán no osan iha loja Leadso, Munisípiu Likisá.
Tuir defeza ba arguidu sira, Defensór Públiku (DP), Estaqui Guterres, hatete prosesu primeiru interrogatóriu ba kazu ida ne’e, tribunal hare katak medida koasaun ne’ebé adekuadu liu maka prizaun Preventiva.
“Tanba ne’e, ohin tribunal liuhusi juis turnu Ersila de Jesus deside aplika medida koasaun prizaun preventiva ba ita nia arguidu nain-3, razaun tanba arguidu nain-3 ne’e iha indísiu katak sira komete duni krime ne’ebé mak imputa ba sira, bazeia ba artigu 183 ba kódigu prosesu penal, katak arguidu sira bele hala’o evidénsia no bele kontinua nafatin sira atividade no bele hasees an husi justisa entaun tribunal aplika medida koasaun prizaun preventiva, “dehan defeza ba arguidu sira, Defensór Públiku Estaqui Guterres ba jornalista sira iha TJPID, Kuarta (03/04).
Defeza hatete tan, au mezmu tempu tribunal konsidera katak arguidu sira komete krime tolu, maka hanesan krime Roubo, iha artigu 253, kódigu penal, krime furtu agravadu, iha artigu 252 kódigu penal, krime sikuestru iha artigu 170 no inklui krime arma branka iha artigu 20, lei númeru 7/2017.
Enkuantu, kazu ne’e akontese iha Aldeia Leopa, Suku Dato, Kinta, (28/03/2024), tuku 03:45, madrugada, arguidu sira halo asaun sobu no estraga tiha odamatan Loja LEADSO.
Tuir provas video CCTV ne’ebé akapta iha loja Leadso-Xinés nian iha Likisa katak, arguidu sira na’ok sasán, utiliza karreta luxu rua ho marka CX-7, kór mutin, Xapa Matríkula A. 12-4xx TL ho karreta Land Cruiser Prado, kór-silver, xapa matríkula 23-0xx TL.
Desizaun ba Prosesu primeiru interrogatóriu ne’e lee sai husi juis turnu Ersila de Jesus, akompaña husi Ministériu Públiku reprezenta husi Prokuradór Ricardo Leite no inklui akompaña husi Defensór Públiku Estaqui Guterres.
Tuir observasaun Timor post iha treinu nota katak, bainhira tribunal aplika medida Preventiva ne’e, família husi arguidu sira hanesan fen kaben no oan sira halerik ho matan been iha tribunal judisiál Primeira Instánsia Dili.
1,803 total views, 3 views today
Bele hare Video Seluk :
Subscribe to Timorpost
