DILI (timorpost.com) – Komisaun Anti Korrupsaun (KAK) liuhusi ekipa medida prevensaun no kombate korrupsaun, Segunda (17/10), kontinua halo buska no apreensaun iha Gabinete Ministru Asuntu Parlamentár no Komunikasaun Sosiál (MAPKOMS) relasiona ho kazu instalasaun Set-Top Box RTTL, E.P.
Ekipa KAK to’o iha edifísiu MAPKOMS Palásiu Governu, oras tuku 8 resin, hodi kontinua rekolla dokumentu lubuk ida, atu nune’e hakle’an prosesu investigasaun. No daudaun ne’e prosesu buska no apreensaun ne’e kontinua la’o namanas hela iha edifísiu MAPKOMS Pallasu Governu.
Entretantu, iha prosesu primeiru interrogatóriu ba kazu ne’e, Tribunal Distritál Dili, liuhusi Juiza Albertina Neves, aplika medida koasaun aprezentasaun periódika ba arguidu GPS, (Asesór MAPKOMS), no medida proibisaun de auzénsia ba arguida MSFC (Na’in ba Kompañia Dili Internal Innovation Information Lda).
Maski iha prosesu alegasaun Ministériu Públiku, ne’ebé reprezenta husi Prokuradór Matias Soares, husu ba Tribunal atu aplika medida koasaun Prizaun Preventiva tanba iha indísiu forte inklui atu asegura prosesu investigasaun.
Iha prosesu primeiru interrogatóriu ne’e, MP promove arguidu no arguida ho krime lima, hanesan Abuzu Podér, Brankeamentu Kapitais, Fraude Fiskál, Partisipasaun Ekonomia Negósiu no Konflitu Interese.
2,246 total views, 6 views today
