DILI, (timorpost.com)— Organizaun Naun Governamentál (ONG) Luta Hamutuk laiha dúvida ho kapaasidade Rui Pereira do Santos, bainhira hetan konfiansa husi Parlamentu Nasionál (PN) no Governu lidera Komisaun Anti Korupsaun (KAK).
Maske laiha dúvida ho kapasidade maibé sujere loloos Governu aprezenta figura na’in-2 ou na’in-3 ba Parlamentu Nasionál (PN) atu nune’e PN bele hili liuhosi eleisaun la’os kandidatu úniku de’it.
Diretór ezekutivu Luta Hamutuk, José Alves da Costa, hatete lia hirak ne’e relasiona ho desizaun Konsellu Ministru ne’ebe hili, Rui Pereira do Santos, hanesan kandidatu úniku ba komisáriu KAK. Tuir nia, loloos ne’e hili figura na’in-2 ka na’in-3, para polítiku sira iha Parlamentu Nasionál iha opsaun no presiza mós haree sira-nia backround, haree kapasidade no haree intergridade antes hili. Kandidatu ba komisáriu KAK mós tenke hatudu sira-nia perfil ba iha públiku antes para públiku bele hatene.
“Ha’u laiha dúvida no laiha problema kestaun kapasidade señor Rui Pereira do Santos nian, tanba nia mós servisu kleur ona iha KAK. Durante ne’e mós sai hanesan adjuntu no mós iha espriénsia servisu iha tribunál, ne’ebé ha’u laiha dúvida ba iha kapasidade, maibé loloos ne’e presiza iha kandidatu na’in-2 ka na’in-3, labele sai hanesan kandidatu úniku, maibé ida-ne’e fila-fali ba desizaun polítika, laiha problema, maibé ba ita-nia hanoin ka interese ida mak hakarak ka lakohi tinan ida-ne’e tenke iha ona komisáriu KAK, ita labele abandona KAK hanesan ne’e”, Diretór ezekutivu Luta Hamutuk, José Alves da Costa, informa ba jornalista sira iha nia kna’ar fatin Faról, Segunda, (26/02).
Maske nune’e, nia hatete ho fikura úniku ne’e mak deputadu husi bakada Fretilin iha Parlamentu Nasionál abandona tan tiha plenária mak posibilidade boot bele anula tan proposta husi Governu ne’e, tanba ne’e, Luta Hamutuk husu ba deputadu sira atu bele diskuti ona tanba komisáriu ne’e importante liu ba instituisaun KAK.
“Lideransa komisáriu KAK iha ona, depois ita hotu tau-matan nia la’o loos ka lae?, tanba KAK nia kompeténsia ne’e la boot, tanba sira la halo investigasaun, investigasaun hotu-hotu ba fali Ministériu Públiku, entaun ha’u hanoin ida-ne’e importante mak presiza tau atensaun”, nia afirma.
Diretór Luta Hamutuk ne’e subliña, kandidatu úniku hakarak ka lakohi prosesu demokrasia tenke iha eliesaun, ne’ebé dalaruma kandidatu úniku ne’e bele lakon, ezemplu tau kotak rua iha ne’eba, ida mamuk no ida kandidatu nian, dalaruma mamuk bele manán, ida-ne’e kuandu manán signifika nia la pasa, entaun tenke buka fali seluk, tanba ne’e lolos númeru ba figura komisáriu KAK ne’e hamosu na’in-2 ka na’in-3.
“Ezemplu hanesan eis komandante polísia, eis komandante militár, no mós eis prokuradór no eis juis sira ne’e bele kandidatu para bele kompete, para figura ne’ebé pasa ba iha lideransa komisáriu KAK nia sente katak ha’u liuhosi kompetisaun mak ha’u mai, ne’ebé nia servisu ho nia pezu ne’ebé mak iha, see kuandu kandidatu úniku, ita bele dehan konfiasa polítiku” nia hatete.
Ho kandidatu úniku ne’e susar uitoan maibé hakarak ka lakohi KAK tenke iha ona komisáriu ida, maibé ida-ne’e fila-fali ba Parlamentu Nasionál, Parlamentu Nasionál mak sei deside.(*)
1,248 total views, 3 views today
Bele hare Video Seluk :
Subscribe to Timorpost
