Liafuan konfiansa ne’e hanesan sentimentu seguransa nian hosi ema ida ba ema seluk relasionadu ho atividade ruma ne’ebé sei hala’o iha ninia servisu.
Enkuantu kritika ne’e hanesan opiniaun ida ne’ebé ho valor no nakonu ho signifikadu atu hadi’a buat ruma, maibé dala ruma kritika ema seluk ne’e tanba la gosta personalidade ema ida nian.
Ligadu ho situasaun ohin loron iha Timor-Leste, bainhira lider sira ne’ebé kaer ukun fó konfiansa ba ema ida atu lidera instituisaun Estadu nian balun, iha ne’ebá sempre hamosu pro no kontra, no pior liután ate ema balun hasai liafuan ne’ebé la konstrutiva.
Kestaun ida ne’e hanesan mós iha loron 01 fulan Setembru 2023, Primeiru Ministru Kay Rala Xanana Gusmão nomeia Longuinhos Monteiro hodi assume kargu diretór Jerál Servisu Nasionál Intelijénsia (SNI), maibé sidadaun balun lansa kritika makaas liuhosi media sosiál hodi hatudu insatisfasaun ba nomeiasaun ne’e.
Sidadaun sira ne’ebé lansa kritika ne’e tanba haree liu ba iha akontesimentu iha loron Segunda (16/01/2023) Autoridade Seguransa kompostu hosi Membru Polísia Nasionál Timor-Leste (PNTL) serbisu hamutuk ho Servisu Nasionál Intelijénsia (SNI) no FALINTIL Forsa Defeza Timor-Leste (F-FDTL), rekolla kilat tolu iha rezidénsia Longuinhos Monteiro nian iha área Loes, Postu Administrativu Maubara, munisípiu Likisá.
Enkuantu, nomeiasaun ne’e bazeia ba artigu 9 númeru 1 husi dekretu lei nu.03/2009, 15 Janeiru fó kompeténsia tomak ba Primeiru Ministru hodi nomeia Diretór Jerál Servisu Intelijénsia nian.
Los duni katak, antes hatún despaxu, Primeiru Ministru Kay Rala Xanana Gusmão hala’o konsultasaun ho Prezidente Repúblika José Ramos Horta.
Maibé iha parte seluk, sidadaun balun kestiona kona-ba nomeiasaun ne’e katak tuir loloos lideransa SNI ne’e labele mai hosi nomeiasaun polítika, mas tenke haree hosi profisionalidade pesoál ida nian, nune’e bainhira hala’o servisu tenke independente.
Espera katak, ho prezensa Diretór Jerál SNI foun ne’e bele hadi’a di’ak liután servisu SNI nian iha futuru, maibé importante mak hala’o servisu tenke tuir regulamentu ne’ebé mak estabelese ona nune’e labele implika ba iha prosesu sira iha rai ida ne’e.
2,766 total views, 6 views today
