Membru Governu ho membru parlamentár iha debate jeneralidade ba proposta lei Orsamentu Jerál Estadu 2024, mosu kontra atake entre Primeiru Ministru, Kay Rala Xanana Gusmão ho deputada Maria Angelica Rangel, iha plenária Parlamentu Nasionál.
Mosu kontra atake tanba Primeiru Ministru la simu intervensaun hosi deputada Maria Angelica Rangel, ne’ebé kritika liu kona-ba prosesu greater sunrise ne’ebé presiza atu halo fali estudu viabilidade foun, nune’e maka Xefe Governu fó liafuan estúpidu.
Ho atitude sira hanesan nune’e, hanoin dezenvolve liu polítika infantíl la’ós hatudu polítika maturidade, ho polítika ida ne’e, sira rasik maka desfama situasaun sira nian no desfama sira ninia aan rasik ho atitude polítika ne’e.
Parlamentu Nasionál nu’udar órgaun soberanu daruak tenke sai hanesan órgaun nobre, atu deputadu sira respeita malu tanba Parlamentár hanesan órgaun reprezentante povu nian.
Polítika ne’e la merese tebes no la fó ezemplu di’ak ba foin sa’e sira, nu’udar reprezentante povu tenke fuan boot no hatudu maturidade oinsá maka atu bele jere diferensa sira. Tanba ne’e maka deputadu sira presiza hatudu polítika interese povu nian, la’ós hatudu polítika ne’ebé maka defende interese ka partidária.
Tuir loloos halo polítika bazeia ba interese povu nian, la’ós atu hatudu polítika hodi defende pesoál, grupu no partidária. Ho polítika partidária maka foin lalais deputadu sira deside atu aprova subsídiu transporte ho montante rihun 1.600 USD kada ema ida ho tratamentu saúde 600 USD. Ida ne’e konsidera hanesan polítika privadu no korrupsaun abuzu podér.
Nu’udar reprezentante povu hatudu polítika públiku, atu halo lei no aprova lei, halo polítika oinsá maka bele defende interese povu, hodi rezolve preokupasaun povu iha territóriu nasionál.
Ho atitude sira ne’e, Prezidente Repúblika, José Ramos Horta, maka tenke fó atensaun ba situasaun iha Parlamentu Nasionál, nune’e deputadu sira bele hetan sansaun polítika.
Nune’e mós fó xamada ba Primeiru Ministru, tanba nu’udar lideransa la hatudu ezemplu di’ak, atu jerasaun foun bele banati tuir, mais hasai fali liafuan estúpidu hanoin la edukativu.
2,205 total views, 3 views today
Bele hare Video Seluk :
Subscribe to Timorpost
