Timorpost.com |POLITIKA –Partidu CNRT ofisialmente hakat ba iha sede Partidu demokrátiku (PD), Segunda 05/06/2023. Iha vizita espesiál ne’e partidu rua espresa vontade pozitivu hodi forma koligasaun no forma governu foun IX governu konstitusionál.
Liu de’it minutu 30 proklamasaun rezultadu legal ofisial eleisaun parlamentár 2023 hosi Tribunal Rekursu, Partidu demokrátiku lideradu hosi Asanami Sabino ne’e hetan kedas resposta hosi CNRT iha tuku haat loraik ne’e.
Estrutura ofisial PD hein iha sede Kolmera hodi simu bainaka hosi CNRT. Iha oras 4:30, mosu iha sede PD oin, Francisco Kalbuady Lay Virgílio Smith no Jacinto Rigoberto, hetan mos reasaun hosi Nivio Magalhaens no estrutura PD seluk
“Xanana maka sai Primeiru Ministru…PD maka CNRT no CNRT maka PD” deklara Sekretariu jerál CNRT, Francisco Kalbuady Lay hodi responde ba jornálista sira katak se loos maka atusai primeiru ministru iha IX governu ne’e.
Kalbuady reafirma prezensa CNRT iha sede PD nian atu responde ba karta ne’ebé espresa dahuluk hosi PD hodi ba vizita no kongratula CNRT iha 30 de Maiu foin lalais.
“Partidu CNRT prontu forma koligasaun ho PD, karta ofisial ami entrega ona, asina hosi Prezidente Partidu Maun Boot Kay Rala Xanana Gusmão, klaru ke partidu rua ne’e agora sai ida deit”, espresa Kalbuady iha konferénsia imprensa.
8,519 total views, 3 views today
