DILI(timorpst)—Dosente Universidade Dili (UNDIL), Hugo Lourenco, hatete, povu hili partidu hodi koloka ninia ema ba tur iha parlamentu nasional hodi luta ba povu nia interrese, la’ós luta ba karreta.
“Nu’udar reprezentante povu nunka Luta ba nia an rasik atu hetan karreta estadu, maibé deputadu tenke Luta ba povu nia interese,” nia dehan ba Timor Post, Segunda (05/06) ligadu parlamentu nasionál atu halo leilaun ba karreta ne’eb’e durante ne’e deputadu sira utiliza iha sira nia mandatu.
Nia hatete, agora la’ós ona tempu ba deputadu sira atu uza podér hodi privatiza patrimóniu estadu, bainhira karik karreta refere seidauk tama ba leilaun tuir lei.
“La’ós luta atu sai dealer ba karreta, se nune’e deputadu loke de’it kompañia ba leilaun karreta”,nia preokupa.
Nia dehan, mandatu deputadu sira hosi kinta lejislatura hela de’it loron besik remata ona, di’ak liu karreta sei bele uza ba deputadu foun iha Sesta Lejizlatura mai bele uza, la presiza leilaun.
Nia la konkorda ho prezidente parlamentu nasionál, nia komentariu ne’ebé dehan politika leilaun ida ne’e parte ida hodi halo jestaun ba patrimóniu, tuir Hugo, komentariu ida ne’e subjetivu hodi buka razaun irrasionál, envezde ko’alia povu nia interese mas ko’alia buka razaun atu privatiza karreta estadu.
Antes ne’e Prezidente Parlamentu Nasionál (PPN), Aniceto Guterres Lopes, hatete, parlamentu nasionál la sosa karreta foun, maibé halo leilaun ba karreta tuan, tanba uza karreta tuan la kleur halo manutensaun, entaun nian despeza ne’e boot.
“Entaun ita halo leilaun, ne’e mak dehan ita halo jestaun, se sosa karreta foun di’ak liu, duke uza karreta tuan halo despeza boot ita rugi hela de’it”, nia hatete ba jornalista sira, hafoin remata enkontru ho primeiru Ministru Taur Matan Ruak, iha parlamentu nasionál, Tersa (30/05).
Nia hatete, bainhira halo manutensaun ba karreta sira ne’e sei fó benefisiu de’it ba ofisina sira, ofisina.
“Ita hakarak business ho bengkel-bengkel sira ne’e para fó han bengkel sira ne’e, para bengkel sira esplora estadu”, nia hatete.
Nia haktuir, durante nia mandatu tenta hamenus despeza estadu, iha lejizlatura ida ne’e bele halo hela, tanba prosesu hahú ona iha tinan kotuk.
921 total views, 3 views today
Bele hare Video Seluk :
Subscribe to Timorpost
