(Reportajen Mateus da Cruz)
Dili (Timor Post)—Prezidente Komisaun Nasionál Eleisaun (CNE-Sigla Portugés), Jose Belo, informa, aban CNE hahú prosesu apuramentu nasionál ba akta hosi munisípiu sira hotu no Diaspora ne’ebé submete mai nasionál no CNE iha tempu oras 72 hodi halo verifikasaun molok anunsia rezultadu no entrega ba Tribunal hodi valida.
“Ohin kuaze tama hotu ona hela de’it ida urna Covalima, hosi estranjeiru hela lori ida ka rua, tanba ne’e aban ita halo ona apuramentu, ita iha tempu oras 72 halo apuramentu”, nia dehan iha konferénsia imprensa ne’ebé realiza iha Salaun CNE, Kaikoli, Kinta ne’e.
Nia dehan, hafoin kumpre oras 72, CNE sei iha tempu oras 24 hodi halo deliberasaun ba akta no sei fó sai iha Sede CNE atu partidu polítiku no kandidatu na’in rua bele asesu.
“Se halo rekursu ruma se laiha sei lori ba Tribunál Rekursu hodi halo promulga,” nia hatete.
Haree hosi rezultadu eleisaun iha primeiru volta hatudu katak votu nulu kiik liu kompara ho eleisaun iha segunda volta.
Tanba ne’e, aban CNE sei hahú halo verifikasaun ba akta sira, tanba tuir lei ida ne’e komprensiva CNE nian, maibé atu valida ba rezultadu eleisaun nian ida ne’e kompeténsia Tribunál Rekursu.
Entretantu daudaun ne’e akta hosi munisípiu 11 maka submete ona mai CNE hodi verifika, sei hela urna hosi munisípiu Kovalima maka seidauk. No hosi Diaspora dala ruma aban maka to’o mai.
“Suai seidauk tanba udan maka’as dalan aat, agora iha dalan hela, no iha li’ur seidauk to’o mai tanba aviaun maibé sira kumpre duni tempu apuramentu,” hakotu. (Lee Notísia Seluk Iha Jornál Timor Post/Asesu You Tube Timor Post)
808 total views, 3 views today
