(Reportajen Jaime Pires/Estaziadu Cardenio Alves/Editor Mateus da Cruz)
DILI (Timor Post)- Kandidatu Prezidente Repúblika ho númeru sorteiu (2), Francisco Guterres Lú Olo, deklara simu rezultadu eleisaun segunda volta ho laran hakmatek no hato’o mós parabéns ba kandidatu Ramos Horta ne’ebé eleitu ba prezidente repúblika ba períodu tinan lima.
“Ha’u simu rezultadu eleisaun segunda volta ho laran hakmatek no ksolok tanba povu rasik mak hili ninia prezidente repúblika no parabéns ba Doutor José Ramos Horta, Prezidente eleitu ba mandatu 2022 – 2027,” nia dehan liu hosi konferénsia imprensa iha Luz Clarita, Sesta (22/04).
Lú Olo hatete, nia simu rezultadu eleisaun segunda volta ida ne’e tanba desizaun mai hosi povu no povu rasik maka espresa liu hosi bulletin votu, direitu polítiku no demokrátiku ida ne’ebé garante husi konstituisaun repúblika.
Nia espera katak, Prezidente eleitu, Jose Ramos Horta, sei koopera ho Parlamentu Nasional, VIII Governu Konstitusionál no Tribunal Rekursu atu hatutan konkista sira ne’ebé hetan ona iha tinan lima liubá ne’e.
Atuál Prezidente Repúblika ne’e mós fó Parabéns ba Povu Timor-Leste tantu feto no mane tanba hatudu maturidade polítika hodi hametin ambiente pás, trankilidade no estabilidade iha tempu kampaña no eleisaun.
Prezidente Partidu Libertasaun Popular (PLP), Taur Matan Ruak, hatete, nia pesoál lori estrutura partidu nian sente kontente no agradese tebes, bainhira bele servisu hamutuk iha ekipa susesu kandidatu prezidente númeru sorteiu 2, Francisco Guterres Lu-Olo, ba vitória iha segunda volta
“hanesan prezidente PLP no estrutura tomak agradese ba maun Lú Olo, tanba priviléjiu ne’ebé fó ba PLP, hamutuk ho partidu seluk hodi servisu hamutuk iha períodu ida ne’e.
“Servisu hamutuk ida ne’e, ami sente kontente, tanba bele partilla momentu sira hanesan ne’e, hodi haburas ita nia demokrasia iha Timor Leste”, nia hatete.
Tuir nia, manan ka lakon laiha problema maibé importante liu maka bele haburas liután demokrasia no hamutuk hari dame, pas no unidade iha nasaun ne’e,
Iha fatin hanesan reprezentante partidu Kmanek Haburas Unidade Nasionál Timor Oan (KHUNTO), Nicolau Lino Freitas Belo, hatete, KHUNTO mós agradese ba kandidatu Lú OLo, tanba nia ema ida ne’ebé mak pasiénsia hodi rona no pasiénsia hodi simu realidade ne’ebé iha.
“biar lakon iha períodu ida ne’e, maibé ami nafatin fó parabéns ba kandidatu mais votadu Jose Manuel Ramos Horta, nafatin suporta, oinsá lori nasaun ne’e ba oin nafatin, hanesan demokrasia husi povu ba povu sei Fila fali ba povu”, hakotu.
Iha konferénsia imprensa ne’e, partisipa husi Prezidente Partidu Libertasaun Populár (PLP), Taur Matan Ruak, Reprezentante Partidu Khunto, Nicolau Lino Freitas, Prezidente Partidu Os Verdes, António Lelehunu, Prezidente Partidu Frente Mudansa, Egidio de Jesus, Sekretáriu Jerál Fretilín, Marí Bin Amude Alkatiri hamutuk ho Kandidatu Prezidente Repúblika, Francisco Guterres Lú Olo ho nia espoza Cidália Mouzinho Lopes.(Lee Notísia Seluk Iha Jornál Timor Post/Asesu You Tube Timor Post)
889 total views, 3 views today
Bele hare Video Seluk :
Subscribe to Timorpost
