DILI, (timorpost.com) — Aban loron-Kuarta, (22/11/2023), Grupu reprezenta Povu Ki’ik sei halo demonstrasaun hodi fó solidariedade no apoiu Manuel Gusmão, ba kazu rai Aimeti Laran, tanba ne’e Komandu PNTL munisípiu Dili hetan ona orientasaun atu asegura demonstrasaun ne’e to’o remata.
“Aban, Kuarta,22/11, sira husi Grupu hanaran Povu Ki’ik, atu halo demonstrasaun solidáriu ba Manuel Gusmão, ne’ebé hasoru problema rai Aimetin Laran”, Komandante Seksaun Operasaun Polísia Nasionál Timor-Leste (PNTL) munisípiu Dili, Inspetór Xefe Polísia, José Luis Amaral, informa ba Timor Post, hafoin hetan karta orientasaun husi Komandu Jerál PNTL, iha Kuartel PNTL munisípiu Dili, Tersa, (21/11/2023).
Komandante Seksaun Operasaun PNTL munisípiu Dili, Inspetór Xefe Polísia, José Luis Amaral, hatutan “Karta koñesimentu, sira (Grupu Povu Ki’ik) haruka no hasa’e ona ba Komandante Jerál PNTL, ne’e maka hatún orientasaun mai Komandu munisípiu Dili orienta ami parte operasionál atu fó seguransa”.
Demonstrasaun ka asaun solidariedade ne’e Grupu Povu Ki’ik ne’e sei hala’o durante loron ida ho objetivu atu kontra desizaun Tribunál nian liga ho kazu disputa rai Aimetin Laran.
Fatin destinadu ba demonstrasaun mak iha área Tasi-Tolu no sei partisipa husi povu ki’ik sira husi Hera, tanba ne’e Komandu PNTL munisípiu Dili sei koordena ho Unidade Espesiál Polísia (UEP), Unidade Polísia Marítima (UPM) hodi akompaña movimentu pasífiku ne’e husi Hera ba to’o fatin konsentrasaun mak iha Tasi-Tolu.(*)
4,812 total views, 3 views today
Bele hare Video Seluk :
Subscribe to Timorpost
