DILI-Iha Sentru Votasaun Paralelu (SVP), Eskola Tekniku Vokasional (ESTV) Bekora, iha votante kuaze 200-resin mak la konsege ezerse sira nia direitu, entaun sira halo protesta tanba sira lakon votu.
Votante Olinda Ximenes, husi munisipiu Lospalos, ne’ebé la rejistu, agora tur hein hela iha sentru refere, governu karik bele autoriza sira hodi vota.
“Hau husi Lospalos, hau hakarak vota iha ne’e, maibe sira dehan labele,” inan ho idade tinan 70-resin ne’e ba Timor Post, iha Sentru Votasaun ESTV, Bekora, Sabadu (19/03).
Kona-ba karik durante ne’e nia rejistu hodi halo votasaun iha Dili, maibe nia dehan, la rejistu iha sentru votasaun paralelu, ho razaun la hetan informasaun.
Tanba ne’e, nia husu ba governu, oinsa mak bele autoriza sira bele vota, hodi hili kandidatu ne’ebe sira hakarak vota ba.
Preokupasaun hanesan hatoo mós husi Abel do Carmo, ne’ebé ho kartaun eleitoral munisipiu Vikeke no natural husi munisipiu Covalima ne’e mós lamentavel, tanba labele ezerse sira nia direitu iha loron votasaun ne’e.
“Ami atu ba munisipiu maibe ami osan laiha selu transporte, tanba ne’e mak ami mai iha ne’e no vota iha ne’e, maibé iha la autoriza ami atu vota, ne’e labele,” Abel lamentavel.
Bainhira husu, antes ne’e karik rejistu iha sentru votasaun paralelu, maibe nia dehan, la rejistu tanba la asesu informasuan kona-ba ida ne’e.
“Maibe ami la preokupa ho ida ne’e importante ami tenke vota, ami hakarak fo ami nia votu,” nia hateten akompaña ho lian haklalak husi sira seluk ne’ebe la lakon votu mós.
Entretantu bainhira Timor Post konfirma asuntu ne’e ba iha Prezidente Sentru Votasaun ESTV Bekora, Domingas Soares, dehan sira atende deit, naran ne’ebe tama iha lista laran, sira ne’ebe naran laiha, ne’e labele atende.
“Ami so atende deit naran sira ne’ebe iha lista, kuandu laiha iha lista, ne’e labele. Kuandu hau simu sira, entaun ne’e hau sala, diak liu lalika tanba sira ne’e la rejistu,” Brigada Domingas hateten.
Nia parte m’os simu komplain, katak sira balun rejistu naran iha suku, maibe sira nia naran la tama iha lista STAE nian, entaun sira labele vota mós.
“Ami servisu tuir lei ne’ebé iha,” nia katak.
Portantu, Observadór internasional husi nasaun CPLP, José Guerreiro Alves, observa katak votasaun iha sentru votasaun ne’e la’o ho demokrasia.
“Hau haree buat hotu la’o ho di’ak, ne’e demokrasia,” Jose hatete.
Husu kona-ba oinsá ninia haree ba votante sira husi munisípiu ne’ebe la konsege ezerse sira nia diretu, nia dehan, sira tenke rejistu kuandu hakarak vota iha ne’e.
“Tenke tuir lei ne’ebé iha,” nia katak.
No tuir observasaun ne’ebé Timor Post nota iha fatin refere, haree katak votante husi munisípiu Lospalos, Baukau, Vikeke inklui Manatutu barak loos mak lakon sira nia direitu, tanba sira labele vota iha Dili.
Votante sira ne’e, husi ferik, katuas, maioria joven feto no joven mane, sira tur grupu, hodi hein karik governu muda ninia hanoin, no autoriza sira vota.(ita)
1,052 total views, 3 views today
Bele hare Video Seluk :
Subscribe to Timorpost
