Ermera (timorpost.com)—Professor voluntáriu Munisípiu Ermera hato’o sira nia ezijénsia ba Ministériu Edukasaun (ME), atu hapara professores kontratadu fulan Abríl 2023 nian.
“Ami professores Voluntáriu no reklamante Munisípiu Ermera hato’o ami nia ezijénsia ba Ministériu Edukasaun, atu hapara professores kontratadu fulan Abríl 2023 nian, ne’ebé hala’o husi ME oitavu governu nian” Feliciano M da Silva relata iha Konferénsia Imprensa ne’ebé mak hala’o iha Gleno, Kinta (14/12).
Porta voz ne’e haktuir, razaun husi reklamante ne’e ba prosesu selesaun ba professores voluntáriu ne’ebé hala’o husi Ministériu Edukasaun iha fulan Abríl 2023 iha Oitavu Governu nian tempu, konsidera la justu no la tuir kritériu ne’ebé mak aplika ona.
“Ami konsidera ne’e la justu no la tuir kritériu ne’ebé maka Ministériu aplika, tanba tuir regra Ministériu nian ema ne’ebé maka atu hetan asina kontratu sai professor kontratadu ne’e tenke hahú hanorin husi tinan 2017 ba kotuk, maibé ami balu hahú voluntáriu husi 2014 to agora la hetan kontratu.”
Nia haktuir, aleinde ida ne’e iha eskola iha munisípiu Ermera iha professores balu la voluntáriu, maibé nia naran tama iha lista kontratu nian, maibé ema seluk maka mosu fali iha eskola refere no sira professores voluntáriu mós la koñese ema ne’e mai husi ne’ebé. Iha mós profesores balun asina kontratu dala rua husi ministériu edukasaun.
“Iha mós professor kontratadu 2023 nian balu ne’ebé maka depois asina tiha kontratu ba servisu fali iha rai li’ur no nia saláriu kontinua lao normal maski la hanorin tiha ona iha eskola”. Nia dehan.
Bazeia ba faktu hirak ne’e professor voluntáriu no reklamante Munisípiu Ermera husu ba governu liu husi Ministériu Edukasaun atu halo de’it teste poor méritu ba professores voluntáriu no reklamante iha territóriu Timor laran tomak atu buat hotu la’o tuir sistema.
“Ami professores voluntáriu no reklamante Munisípiu Ermera husu ba governu liu husi Ministériu Edukasaun atu halo de’it teste poor Méritu ba professores voluntáriu no reklamante iha territóriu Timor laran atu buat hotu la’o tuir lei no sistema vale ba sidadaun hotu”. Hakotu.
1,320 total views, 3 views today
Bele hare Video Seluk :