DILI (timorpost.com)—Diretór Eskola EFP 02 Bidau Masaur José Gusmão, lamenta tebes iha pesoál eis deputada iha lejislatura da-lima okupa aredores eskola no lakohi sai impaktu ba eskola atu loke aula foun.
Diretór José Gusmão hatete, rai ne’ebé okupa husi pesoál eis deputada, uluk hanesan dormitóriu eskola nian, depois iha krize 2006, ema mai hodi hela. Maibé to’o ohin loron lakohi sai.
“Eskola fó ona karta notifikasaun, maibé depois ida ne’e pesoál refere fila-fali ba halo uma iha rai eskola nian ho andár”. Nia hatete ba jornalista Timor post iha nia knaar fatin, Tersa (17/10/2023).
Diretór José Gusmão dehan, eskola mós fó indemizasaun ba sira simu tia indemizasaun fila-fali ba halo uma iha rai eskola nian no nafatin sira okupa arredores eskola nian.
“Bainhira sira hahú halo uma parte eskola tenta komunika ho sira hodi buka solusaun tanba rai refere hola parte iha eskola nian, maibé sira la fó ulun kontinua halo nafatin uma iha areadores eskola”.
Tanba ida ne’e parte eskola hato’o ona keixa ba Autoridade Suku Bidau Santana no mós haruka karta abertu ba administradór Postu Kristu Rei liga ba pesoál ne’ebé okupa arredores eskola nian hodi halo uma ba.
“Parte eskola mós iha 2016 haruka ona karta ba diretór seksaun edukasaun munisípiu Dili oinsá mak bele rezolve lalais ba problema refere tanba eskola atu hari aula foun, maibé arredores eskola nian ema sei okupa difisil ba eskola atu loke aula foun”. Hakotu
1,731 total views, 3 views today
Bele hare Video Seluk :