DILI, (timorpost.com)— Peskizadór Asia Justice and Rights (AJAR), Inocencio de Jesus Xavier, hatete Universidade Nasionál Timor Lorosa’e (UNTL) presiza aplika Drop Out (DO) ba estudante sira ne’ebé durante tinan barak la ativu iha estudu.
Nia hatete, universidade iha regra própriu, iha mundu tomak universalmente aplika DO, satán universidade estatál labele husik estudante ida sein matríkula, la hatene nia kontinua ka la kontinua. Dadus ne’ebé UNTL fó sai katak sira rekolla ona naran estudante husi tinan 2000 até 2024, sei hahú husi 2000 to’o 2012 identifika estudante ne’ebé tama iha lista DO hamutuk rihun 25 resin, ida-ne’e keta halo ba eskola ona iha fatin seluk, tanba kolega balun mós ba eskola tiha universidade seluk.
“Ha’u hanoin universidade presiza aplika duni regra DO ne’e, hodi nune’e labele fó todan, tanba ne’e afeta mós ba kualidade avaliasaun ANAAA (Ajénsia Nasionál ba Avaliasaun no Akreditasaun Akadémika) nian, ne’ebé bele fó prejuizu ba universidade nian naran, liuliu kapasidade ba orienta estudante sira”, Inocencio informa ba jornalista sira iha nia kna’ar fatin, Faról, Tersa, (02/04).
Tanba ne’e, nia husu universidade atu haree kestaun ida-ne’e, no presiza tetu mós nia sirkurtánsia, tanba tuir nia haree tempu barak ona UNTL halo esforsu no aprosimasaun barak ho estudante sira ne’ebé la ativu, ko’alia ho sira atu fila-fali ba resjistu hodi bele konklui sira-nia estudu, maibé balun até la partisipa to’o ohin loron.
“Ha’u hanoin universidade tenke iha duni regra forte hodi haree situasaun ne’e para bele mellora di’ak liu universidade ba oin”, nia hatete.
Antes ne’e, Reitór UNTL, João Soares Martíns, informa liu festa Páskua UNTL sei publika estudante ne’ebé naran tama iha lista DO hamutuk rihun 25 resin.(*)
2,115 total views, 3 views today
Bele hare Video Seluk :