DILI, (timorpost.com)— Prezidente Repúblika (PR), José Ramos Horta, hetan atualiza informasaun husi Magnífiku Reitór Universidade Nasionál Timor Lorosa’e (UNTL), João Soares Martíns, kona-ba problema infraestrutura, rekursu umanu no seluk tan, nune’e Xefe Estadu promete sei aprosima ho nasaun Xina no Abu Dhabi – Uniaun Emiradu Árabe (UEA) atu bele apoiu.
“Prezidente Repúblika mós informa katak Xefe Estadu iha ninia kolega barak ne’ebé bele ajuda mós kestaun infraestrutura. No Xefe Estadu bele aproximasaun ho Governu Xina ka Governu UEA ka Qatar karik sira bele iha interese atu apoia dezenvolvimentu infraestrutura UNTL ninian. Mais ne’e sei ideia, Xefe Estadu promete katak karik Xefe Estadu ba vizita Xina, Abu Dhabi nia sei hato’o ideia ne’e, mais ha’u hanoin importante mak timoroan Governu mak responsablidade aas liu atu bele tau prioridade ba investimentu infraestrutura”, Magnífiku Reitór Universidade Nasionál Timor Lorosa’e (UNTL), João Soares Martíns, haktuir ba jornalista sira iha Palásiu Prezidensiál, Bairru-Pité, Segunda, (25/03) hafoin enkontru ho Xefe Estadu.
Durante enkontru ho Xefe Estadu, Magnífiku Reitór akompaña husi nia estrutura UNTL ko’alia liu kona-ba progresu no defikuldade ne’ebé universidade hasoru.
“Ohin ami hasoru malu ho Prezidente Repúblika ko’alia kona-ba Universidade Nasionál Timor Lorosa’e (UNTL) nia progressu no ami mós informa kona-ba difikuldade ne’ebé universidade atravesa. Dezafiu sira maka kona-ba rekursu umanu, infraestrutura, resenseamentu, ami-nia kampuu kuaze espailadu iha Dili laran tomak, maibé di’ak liu ne’e mak kampus tenke sentralizadu iha fatin ida, maka iha Hera ne’e”, nia hatete.
Hafoin informa progresu no dezafiu sira ne’e, Prezidente Repúblika disponível 100% apoiu UNTL no sei ko’alia ho Governu liuliu Primeiru Ministru para bele fó atensaun maka’as hodi investe iha UNTL.
Aliende ne’e, iha enkontru ko’alia mós kona-ba selebrasaun tinan 25 ezisténsia UNTL nian ne’ebé sei selebra iha tinan oin 2025.
“Ami ko’alia mós kona-ba kestaun lubuk ida ne’ebé importante, liuliu ba 2025 agora UNTL halo tinan 25, ami sei halo selebrasaun ida ne’ebé prepara mós ba tinan 50 koñesidu ba proklamasaun RDTL ninian, tanba ne’e mak ami informa ba Xefe Estadu karik bele Xefe Estadu bele mós marka prezensa iha 25 mai”, nia informa.
Entretantu kona-ba Sidade Universitáriu Aileu ne’ebé muda mai iha Hera, Reitór UNTL ne’e haktuir Xefe Estadu interesadu tebes no husu Gpvetnu atu tau atensaun ba dezenvolvimentu infraestrutura UNTL nian.
Parte UNTL mós ezije Estadu no Governu liuliu Governu Konstitusionál da-IX atu bele tau atensaun ba progresu sidade Universitáriu ne’ebé muda fali mai Aileu, intermus dezenvolvimentu infraestrutura universidade nian.(*)
2,793 total views, 3 views today
Bele hare Video Seluk :
Subscribe to Timorpost
