Dili(timorpost.com)—Sekretáriu Estadu Juventude no Desportu (SEJD) no Instituto Nacional de Formação Doscentes e Profissionais da Educação de Timor Leste (INFORDEPE) asina akordu kona-ba kapasitasaun Rekursu Umanu ba profesór ne’ebé mak hanorin matéria desportu fízika. Asina akordu ne’e realiza iha sala Meeting Room SEJD, Sesta (23/06).
Iha asina akordu refere, Ministru Edukasaun Juventude no Desportu, Armindo Maia ho Sekretáriu Estadu Juventude no Desportu, Abrão Nokosiku Saldanha, akompaña asina akordu entre Prezidente INFORDEPE, Manuel Gomes de Araújo no Diretór Jerál Juventude no Desportu, David Tomas de Deus.
Akordu ne’e ho objetivu kapasitasaun Rekursu Umanu ba profesór sira ne’ebé mak ne’ebé hanorin matéria Desportu Fíziku.
Iha okaziaun ne’e Ministru Edukasaun Juventude no Desportu, Armindo Maia, hatete nia sente haksolok tebes ho akordu servisu hamutuk entre SEJD ho INFORDEPE. Tuir nia Objetivu hosi asina akordu refere atu prepara rekursu umanu iha parte Desportu fíziku ne’e importante tebes.
Iha fatin hanesan Sekretáriu Estadu Juventude no Desportu, Abrão Saldanha, hatete baibain ko’alia kona-ba setór desportu sempre iha relasaun ho dezenvolvimentu kapasidade fíziku, tanba ne’e akordu ne’ebé asina ne’e sei fasilita di’ak liu tanba profesór desportu sira nia koñesimentu kle’an liu tan kona-ba matéria dezenvolvimentu fíziku, nune’e sira bele tranzmite ka hanorin di’ak liu tan.
Serimónia asina akordu servisu hamutuk asiste hosi Xefe Departamentu Desportu Edukasionál Komunitaria, Xefe Departamentu Detesaun Talentu, Xefe UCRP no mós Staff Gabinete DJJD.
Notísia ne’e Timor Post asesu liuhosi pájina facebook SEJD nian, Segunda (26/06/2023).
980 total views, 3 views today
Bele hare Video Seluk :