Dili(timorpost.com)—Jogadór Selesaun Nasionál Timor-Leste, Paulo Domingos Gally Freitas, hahú treinu hamutuk ona ho nia klube foun hosi Indonézia PSIS, hodi prepara ba Liga Primeiru Divizaun.
Nia dehan, daudaun ne’e nia iha ona Indonézia, nia ba dezde iha fulan kotuk no agora hamutuk hela ho klube foun ne’ebé mak kontratu nian hodi halo preparasaun ba sira nia jogu.
“Sim ha’u agora iha ona Indonézia no ami kada loron treinu hela hodi hasoru Liga Primeiru Divizaun Indonézia nian ne’ebé sei la’o iha tempu badak, inklui ba jogu Freday Match nian”, hatete Gally Freitas, ba Timor Post via WhatsApp, Kuarta (07/06).
Nia subliña, tanba ne’e nia sente kontente tanba klube PSIS hosi Indonézia ne’ebé mak kompete iha Liga Divizaun dahuluk Indonézia nian bele tau Konfiansa ba nia hodi kontratu nian.
Tanba ne’e agora preparasaun ho ekipa tomak di’ak, kada loron la’o normál, nia esforsu oinsá bele adapta lalais nia kompatriota sira hosi klube refere.
“Konfiansa ne’e osan mean, entaun ita tenke responsabilidade ba sira konfiansa ne’ebé mak sira fó mai ha’u, sei esforsu nune’e bele hatudu prestasaun di’ak”, nia hateten.
Tuir Gally, ema hotu hadau malu atu joga iha liga primeiru divizaun Indonézia nian, maibé laiha klube ida mak fiar sira, entaun agora klube PSIS fó fiar ba nia ne’e nia sei tane responsabilidade ida ne’e.
Nia subliña, hanesan jogadór timoroan sente orgullu, tanba klube boot hanesan PSIS bele hili nia hodi fó kontratu ba nia, maski kolega barak esforsu maibé la hetan oportunidade ida ne’e.
969 total views, 9 views today
