DILI-Ministériu Edukasaun Juventude Desportu (MEJD) hamutuk ho Ministériu Administrasaun Estatál (MAE) no parseiru lansa programa haat (4).
“Ami hamutuk ho parseiru sira halo lansamentu ba programa haat maka entrega sertifikadu ba estudante hamutuk 309 husi sentru hamutuk 17, no programa da ruak maka abertura programa Eskola Iha Uma (EIU) tinan 2023 ne’ebé espanda iha munisípiu haat, Ermera, Dili, Baukau, Bobonaru”, informa Ministru Edukasaun Juventude Desportu, Armindo Maia, ba Timor Post hafoin enseramentu lansa video mundu ba labarik iha Timor Plaza, Sábadu (15/04).
Aleinde ne’e mós, halo lansamentu biblioteka movel EIU, iha programa seluk maka lansamentu video mundu labarik nian ba públiku hodi asesu.
Governante ne’e esplika, programa haat ne’e liga ba dekretu lei númeru 35/2022 iha loron fulan Maiu hateten, katak eskola iha uma ne’e hanesan projetu pilotu ne’ebé konxiste ne’ebé estabelese brigada movel ne’ebé ho objetivu hodi fornese no suporta ba estudante idade ki’ik aprende iha uma.
Portantu, programa eskola iha uma ne’e nia durasaun fulan 3 loron ida iha oras tolu hanesan prosesu ensinu aprendizajen liuliu labarik ki’ik idade tinan 5-7 hodi aprende edukasaun pre-eskolár iha suku no aldeia hodi haforsa no hariku sira nia koñesimentu uitoan hodi hakat ba eskola primária.
Iha parte seluk mak programa eskola uma ba labarik sira ne’e ho objetivu maka atu fasilita labarik estudante ne’ebé tinan sei ki’ik bele aprende lala’ok eskola nian no prepara nia mentalidade hodi asesu ba iha edukasaun ensinu báziku.
Enkuantu, eskola iha uma ne’e ho objetivu seluk maka, prepara labarik idade tinan 5-7 ne’e ho programa intensivu hodi nune’e labarik sira prontu matríkula ba primeira klase ensinu báziku eskolár tinan 2023.
Tanba ne’e, governante ne’e husu, ba inan aman no autoridade lokál nafatin apoiu desizaun ida di’ak no estratéjiku atu suporta no implementa programa refere susesu iha futuru.
Programa refere implementa iha sentru hamutuk 36 no rejistu labarik husi munisípiu hamutuk 1050 ho númeru hirak ne’e labarik ne’ebé kompletu ensinu susesu hamutuk 1003.
Programa haat ne’e hanesan eskola ba uma bele suporta prosesu aprendizajen integradu ba estudante idade bele asesu ba edukasaun, iha parte seluk mak lansa video mundu labarik ne’ebé konsidera hanesan rekursu alternativa hodi suporta aprendizajen labarik husi uma.
Enkuantu, lansa biblioteka movel EIU ne’ebé hamosu hodi bele fornese rekursu adekuadu hodi suporta atividade ensinu báziku iha eskola iha uma iha futuru sai kualidade.
Portantu, orsamentu gastu ba programa haat ne’e ho montante 2.1 millaun liu husi orsamentu ratifikativu kofre ba profesór sira nia saláriu ne’ebé hanorin labarik sira durante fulan tolu nia laran no mós hadi’a fatin sira ne’ebé uza hodi hanorin estudante sira.
Iha sorin seluk, reprezentante inan aman Imaculada Tavares husu, MEJD atu kontinua programa ne’e ba oin hodi fasilidade labarik idade tinan 5-7 hodi partisipa iha prosesu aprendizajen no prepara sira nia mentalidade hodi hakat ba eskola primária.
“Tanba ne’e ami kontente no agradese ba governu liu husi MEJD ne’ebé fasilita ona estudante sira bele eskola iha uma hodi aprende matéria no prepara sira nia mentalidade di’ak iha futuru”, nia agradese.
954 total views, 6 views today
Bele hare Video Seluk :
Subscribe to Timorpost
